VOV4.Bahnar - ‘Năr 04/11 (jơ tơ ring), lơ̆m jơ năr năm tơ mang tơ̆ teh đak Cộng hòa Phalăng, Thủ tướng teh đak Phạm Minh Chính hlôi sơng pơ ma dơ nuh hăm ƀok Pha-biêng Rút-xen, Bí thư toàn quốc Đảng Cộng sản Phalăng.Tơ̆ ‘măng tơ ƀơ̆p, Thủ tướng Phạm Minh Chính lăng ‘lơ̆ng dôm trong jang 2 păh drơ̆ng nơ̆r vă hơ nhăk tơ drong pơ vei hơ tŏk tơ iung jrŭ să păng đei yua hloh, mă loi ‘noh jĭ lơ̆m rim tơ drong jang tŏk bŏk đei ƀôh hrei ‘nâu lơ̆m hơ tŏk tơ iung kơ pơ đĭ 2 teh đak.

Tơ ƀôh đon chhôk hơ iă găh rim jơ nei đơ̆ng Đảng Cộng sản Việt Nam lơ̆m chĕp kơ̆l teh đak păng găh tơ drong pơ vei jang hơ dai đơ̆ng 2 teh đak ưh kơ đei pơ dơh đei hơ met ming păng hơ tŏk tơ iung, ƀok Bí thư  toàn quốc Đảng Cộng sản Phalăng Pha-biêng Rút-xen lui ngeh ‘măng năm tơ mang ‘măng âu đơ̆ng Thủ tướng Phạm Minh Chính gô pơm tơ drong ‘lơ̆ng ăn tơ drong pơ vei đơ̆ng 2 teh đak hơ nơ̆ng hơ tŏk tơ iung pran kơ tang tơ̆ hơ năp kơnh. Dôm bơ ngai cộng sản Phalăng ling lang tơ gŭm păng gô hơ nơ̆ng hơ drin đĭ jơ hngơ̆m vă tơ gop ưh kơ pơdơh hơ met ming tơ drong pơ vei jang hơ dai ‘lơ̆ng hơ iă đơ̆ng 2 Đảng, 2 teh đak păng kon pơ lei 2 teh đak Việt Nam păng Phalăng.

Thuem: Tơ blơ̆