VOV4.Bahnar - Tơ̆ Anih jang kơ Khul kơ dră tĕh đak, Thủ tướng Phạm Minh Chính sơng yă Victoria Kwakwa, Phŏ Kơ dră Anih mong jên apŭng plenh tĕh (WB) vei lăng tơ ring Đông Á păng Thái Bình Dương oei hơ pong păng bơ̆ jang tơ̆ Việt Nam.

Hăm jơ hngâm đon chơt hơ iă, Thủ tướng hôn bơ nê yă Victoria Kwakwa năm dơ̆ng tơ̆ Việt Nam, pơ ma hơ dăh WB jĭ anih jang hơ doi vă atŏk tơ iung tôch gĭt kăl hơ nơ̆ng tơ gŭm, tơ gop ‘lơ̆ng ăn tơ drong jang tŏk mĭk drăm, tơ pôl kơ Việt Nam; atŭm hăm ‘nŏh tơ chĕng ‘lơ̆ng WB đei lơ trong jang tih tôch đei yoa, lăp hăm dôm trong jang, tơ drong vă jang tŏk đơ̆ng Việt Nam lơ̆m rim chăl.

Thủ tướng bơ nê WB hlôi tơ gŭm ăn Việt Nam gơ̆t lê̆ ‘mơ̆i tơ drong kla jên tŏk iŏk IDA vă đei dơ̆ng kon jên bơ̆ jang tang găn jĭ păng vei kơ jăp tơ drong jang tŏk; tơ chĕng ‘lơ̆ng tơ drong pơ chĕh đơ̆ng WB hlôi tơ gŭm ăn dôm tĕh đak tang găn jĭ COVID-19, lơ̆m nŏh đei Việt Nam.

Dơ̆ng: Tơ blơ̆