VOV4.Bahnar - ‘Năr 14/11, ƀlep ƀât Năr thây kô Việt Nam (20-11), Thủ tướng Phạm Minh Chính tơ ƀâp bơ ngai tang măt ăn thây kô, kăn ƀô̆ vei lăng pơ tho pơ hrăm rơ gei. Tang măt ăn kơ dră chĕp kơ̆l Đảng păng tĕh đak, Thủ tướng Phạm Minh Chính tơ ƀôh đon mơ nat hăm tơ drong mơ mat tat, chih răk păng pôk pơ ư tơ drong adrin, tơ drong jơ nei mưh yak hlŏh mơ mat tat đơ̆ng khul thây kô lơ̆m tĕh đak.

Thủ tướng Phạm Minh Chính tơ ƀâp bơ ngai tang măt ăn thây kô rơ gei

Kiơ̆ Thủ tướng, hrei ‘nâu lơ̆m tĕh đak oei bơ̆ jang lơ trong jang tơ plih ‘nao gĭt kăl, tôm tơ drong găh pơ tho pơ hrăm vă hơ tŏk tơ drong ‘lơ̆ng đơ̆ng pơ tho pơ hrăm ăn rim jăl hŏk. Trong jang ‘nŏh: Iŏk hŏk tro pơm tơm; năng kăl găh jơ hngâm đon ‘lơ̆ng, gơ̆h hơ gei đơ̆ng hŏk tro.

Ƀât mă oei đei tơ drong jĭ hrei ‘nâu, Khul kơ dră tĕh đak vă sek tơ lang hrôih dôm tơ drong kăl dang ei vă pơ jing ăn anih pơ tho pơ hrăm jang kiơ̆ trong sơ đơ̆ng, tang găn ‘lơ̆ng jĭ. Kiơ̆ kơ ‘nŏh, Khul kơ dră tĕh đak drơ̆ng nơ̆r ưh đei lê̆ đe kon mon hŏk trư̆k tuyê̆n đunh; pơ jao ăn Anih tơm vei lăng pơ tho pơ hrăm, Anih tơm vei lăng jang pơ gang vang jang hơ doi hăm dôm tơ ring đei trong hơ met pơ ‘lơ̆ng tơ drong ‘nâu kiơ̆ trong jang dar dĕh mă lei athei kơ chăng, pơm ‘lơ̆ng hăm tơ drong tang găn jĭ.

Dơ̆ng: Tơ blơ̆