VOV4.Bahnar - Thủ tướng Phạm Minh Chính ‘nao đei ‘măng tơ ƀơ̆p muh măt bơ ngai tang măt bơ ngai đei kŏng hăm kach mang, ŭnh hnam linh lôch dŏng teh đak Ƀlep ƀơ̆t tơ băt 74 sơ năm năr Linh jĭ rơ ka - Linh lôch dŏng teh đak  (27/07/1947-27/07/2021). Tơ̆ jơ tơ ƀơ̆p muh măt, 50 ‘nu bơ ngai tang măt bơ ngai đei kŏng jang ‘lơ̆ng tang măt ăn jơ hngơ̆m đon hơ drin, yak hloh mơ mat tat lơ̆m tơ drong arih sa, tơ gop đĭ jơ hngơ̆m lơ̆m tơ drong jang pơ jing păng hơ tŏk tơ iung teh đak tang măt ăn hloh 9,2 triệu ‘nu bơ ngai đei kŏng lơ̆m teh đak hlôi vang pơ dâu dơ̆ng dôm tơ drong oei ƀlŏk găh tơ drong tơ blăh iŏk rơ ngei hơ drĕch hơ drŭng.

Thủ tướng Phạm Minh Chính tơ ƀơ̆p muh măt bơ ngai tang măt bơ ngai đei kŏng hăm kach mang, ŭnh hnam linh lôch dŏng teh đak

Pơ ma tơ̆ jơ tơ ƀơ̆p muh măt, Thủ tướng Phạm Minh Chính tang măt Kơ dră chĕp kơ̆l Đảng, teh đak, gơ̆ih truh rim kră jang kach mang sơ̆, dôm mĕ Việt Nam nuih mơng, rim linh nŭih mơng kon pơ lei, rim linh jĭ rơ ka, jĭ jăn, ŭnh hnam linh lôch dŏng teh đak, bơ ngai đei kŏng hăm kach mang tơ drong ƀlŏk hơ dơ̆r păng băt bơ nê  gĭt kăl hloh. Thủ tướng pơ ma hơ dăh tơ drong băt bơ nê tơ klep hăm hơ năp jang ling lang jing tơ drong đei lơ̆m đon tơ chĕng păng bơ̆ jang đơ̆ng rim kơ dră chĕp kơ̆l, lơ̆m kon pơ lei kŭm jing tơ drong joăt joe oei sa ‘lơ̆ng hơ iă đơ̆ng hơ drĕch hơ drŭng bơ̆n.

Thuem: Tơ blơ̆