VOV4.Bahnar  – Kơtă đơ̆ng rŏng kơ truh teh đak Anh vă năm Hop akŏm 'măng mă 26 dôm Păh vang jang Tơchơ̆t atŭm kơ Liên hơp kuôk găh Hơyuh tô̆ 'mi tơplih păng bơ̆ jang tơ̆ teh đak Anh, Thủ tướng teh đak bơ̆n Phạm Minh Chính hlôi tơjrâ̆m Kơdră tơring Scotland yă Nicola Sturgeon.

Kơdră tơring Nicola Sturgeon lui ngeh Việt Nam gô tơgop kăp gĭt lơ̆m tơdrong đei jơnei atŭm kơ Hop akŏm. Yă kơdră bơnê kơ tơdrong tơgop kăp gĭt đơ̆ng Việt Nam ăn tơdrong adrin atŭm găh tơjră hăm hơyuh tô̆ 'mi tơplih, ăn tơbăt Scotland hlôi pơkăp tơjur tơlĕch hơyuh 'mê̆ ăh xơnăm 2045 păng găh plei tơm Glasgow, tơring gô pơgơ̆r tơdrong hop akŏm COP26, pơkăp tơjur hơyuh 'mê̆ tơpăr kơsô̆ 0 ăh xơnăm 2030. Thủ tướng Phạm Minh Chính bơnê kơ tơdrong hơtŏk tơbôl đơ̆ng  Việt Nam păng Scotland, tơring jang mŭk drăm hơtŏk tih mă ƀar kơ teh đak Anh, ưh adrô̆ kăp gĭt găh tơdrô whisky mă đe ư ang lơ̆m kơpal teh mă oei đei lơ tơdrong pran găh gơh rơgei, mŭk drăm sô̆, jên hu  – bảo hiểm, jang găh đak dâu hơyuh xoh, mă kăl noh hơtŏk pơm tơlĕch unh hơyuh 'lơ̆ng xơđơ̆ng.

Lan chih păng pơre nơ̆r