VOV4.Bahnar - Pơ gê 28/12, Thủ tướng Phạm Minh Chính vang akŏm păng iung pơ ma lơ̆m tơ drong jang “75 rơ bâu tơ drong pơ chĕh, yak hlŏh mơ mat tat, jang tŏk” yoa Tổng Liên đoàn Lao động Việt Nam pơ gơ̆r. Tơ drong jang “75 rơ bâu tơ drong pơ chĕh, yak hlŏh mơ mat tat, jang tŏk” đei tơ lĕch đơ̆ng rŏng kơ pơ gơ̆r đang Hop akŏm lơ̆m tĕh đak ‘măng mă XIII kơ Đảng, ƀât mă lơ̆m tĕh đak oei akŏm jơ hngâm tang găn jĭ COVID – 19. Đơ̆ng rŏng vă jê̆ 80 năr pơ jei băl, đĭ đei 250.177 tơ drong pơ chĕh đei tơ lĕch, lơ hlŏh 300% pơ têng hăm kơ sô̆ hơ găt. Tơ drong pơ chĕh vang akŏm lơ̆m tơ drong jang tôch lơ, ƀơm truh lơ tơ drong jang pha ra băl.

Pơ ma tơ̆ âu, Thủ tướng Phạm Minh Chính pôk pơ ư păng hơ iă hăm dôm khul grŭp, rim bơ ngai đei tơ drong pơ chĕh rơ gei, iŏk đei jơ nei ‘lơ̆ng, rơ gei đei pôk pơ ư năr ‘nâu. Thủ tướng pơ ma hơ dăh, Đảng păng tĕh đak bơ̆n ling lang pôk pơ ư, năng kăl tơ drong pơ chĕh, đon juăt jang đơ̆ng rim răih kon pơ lei, mă loi jĭ tơ drong pơ chĕh đơ̆ng bơ ngai jang. Thủ tướng hơ pơi ‘mĕh, Tơ drong jang “01 triu tơ drong pơ chĕh – adrin yak hlŏh mơ mat tat, jang rơ gei, khŏm tang găn đei jĭ COVID-19” gô iŏk đei jơ nei dơ̆ng, tơ iung jơ hngâm pran, đei yoa, tơ gop lơ hlŏh dơ̆ng ăn anih jang kơ tĕh đak, anih tĕch mơ dro păng rim bơ ngai.

Dơ̆ng: Tơ blơ̆