VOV4.Bahnar - Hơ nơ̆ng bơ̆ jang lơ tơ drong đei Hop akŏm tih Grŭp dôm tĕh đak Đông Nam Á (ASEAN) ‘măng mă 38 păng 39, lơ̆m kơ sơ̆ (26/10), Thủ tướng Phạm Minh Chính vang hop akŏm tih ASEAN-Hàn Quốc. Pơ ma lơ̆m hop akŏm, Thủ tướng Phạm Minh Chính akhan, hlŏh 30 sơ năm âu ki, tơ drong pơ vei ASEAN - Hàn Quốc hlôi tŏk pran ‘lơ̆ng, iŏk đei lơ tơ drong jơ nei gĭt kăl, đei yoa, tơ gop ‘lơ̆ng ăn tơ drong rơ ngei, sơ đơ̆ng păng jang tŏk hơ nŭk hơ noa tơ̆ tơ ring.

Việt Nam hôn bơ nê păng tơ gŭm ăn Hàn Quốc tơ lĕch “Trong jang hue lăng tơ̆ tơ ring găh Pơ băh ‘nao” tưk tơ iung tơ drong jang hơ doi hăm tơ ring yoa tơ drong tơm ‘nŏh hue lăng truh tơ̆ Kon pơ lei, Rơ ngei păng hơ nŭk hơ noa; lăp hăm 3 tơ drong tơm vă jang hơ doi đơ̆ng Tơ pôl ASEAN. Thủ tướng Phạm Minh Chính tơ gŭm păng athei Hop akŏm âu kiơ̆ đơ̆ng nơ̆r tơ chơ̆t atŭm jăh hơ tŏk tơ drong jang hơ doi ASEAN - Hàn Quốc.

Dơ̆ng: Tơ blơ̆