VOV4.Bahnar - Sơng iŏk nơ̆r krao đơ̆ng Thủ tướng tĕh đak Campuchia Samdech Techo Hun Sen, ‘năr 9/9/2021, Thủ tướng Phạm Minh Chính truh hop akŏm păng đei ƀai iung pơ ma gĭt kăl tơ̆ Hop akŏm tih Jang hơ doi tơ ring Mê Công pơih xă (GMS) ‘măng mă 7 đei pơ gơ̆r kiơ̆ trong trư̆k tuyê̆n. Vang hop akŏm đei Thủ tướng dôm tĕh đak Campuchia, Lào, Thái Lan, Trung Quốc, Việt Nam; bơ ngai tang măt ăn Myanmar, Kơ dră Anih mong jên atŏk tơ iung châu Á (ADB); păng vă jê̆ 350 ‘nu bơ ngai tang măt dôm anih tơm, anih jang kơ pal kơ 6 tĕh đak, dôm tĕh đak jang hơ doi pơ drŏng păng khul bơ ngai tĕch mơ dro lơ̆m păng ‘ngoăih kơ tơ ring.

Hăm hơ năn “Hơ met kơ jăp jơ hngâm pran vă tơ jră hăm dôm tơ drong nol lơ̆m chăl a nglŏ ‘nao”, Hop akŏm tih jang hơ doi Tơ ring Mê Công pơih xă hlôi hơ len năng rim tơ drong jang hơ doi iŏk đơ̆ng Hop akŏm mă 6 pơ gơ̆r lơ̆m khei 3/2018 păng pơ ma nuh găh trong jang hơ doi lơ̆m chăl a nglŏ ‘nao kŭm nhen dôm trong jang vă gơ̆h tŏk hlŏh đơ̆ng khei ‘năr tôch mơ mat tat hrei ‘nâu. Găh trong vă jang hơ doi lơ̆m chăl ‘nao, Hop akŏm drơ̆ng nơ̆r “Trong jang tơ jră hăm jĭ Covid-19 păng jang tơ iung ming đơ̆ng 2021-2023” păng “Trong jang gĭt kăl đơ̆ng Tơ drong jang hơ doi mŭk drăm 2030”. Kiơ̆ kơ ‘nŏh, dôm kơ dră chĕp kơ̆l tơ lĕch trong vă jang truh sơ 2030 găh 1 tơ ring mât jang hơ doi, hơ nŭk hơ noa păng jang tŏk pran kơ jăp, jơ̆p jang. Pơ tôch hop akŏm, dôm kơ dră chĕp kơ̆l  drơ̆ng nơ̆r hăm Tơ drong tơ chơ̆t atŭm đơ̆ng Hop akŏm păng drơ̆ng nơ̆r pơ gơ̆r hop akŏm tih GMS 8 tơ̆ Trung Quốc lơ̆m sơ năm 2024.

Dơ̆ng: Tơ blơ̆