VOV4.Bahnar - ‘Năr 7/9, Thủ tướng Phạm Minh Chính pơ gơ̆r hôp trư̆k tuyê̆n Khul kơ dră tĕh đak, dôm anih tơm, anih jang kơ pal đei ƀơm truh hăm dôm dêh char, plt đei đak dơ sĭ găh tơ drong tang găn rôp yâu ka hơ dang glăi luơ̆t, ưh đei roi tơ băt păng ưh đei pơm kiơ̆ tơ drong hơ găt. Tơ̆ hop akŏm, dôm tơ ring tơ ter đak dơ sĭ tơ roi ăn Thủ tướng tĕh đak tơ drong jang kiơ̆ nơ̆r pơ tho đơ̆ng tơ ring kơ dih, atŭm hăm ‘nŏh pơ truh ăn Khul kơ dră tĕh đak, Thủ tướng tĕh đak lơ nơ̆r pơ ma apinh păng pơ kăp hăm Thủ tướng vă adrin găn đĭ tơ drong ‘nâu.

Pơ ma pơ tôch hop akŏm, Thủ tướng pơ ma hơ dăh, kiơ̆ trong jang atŏk tơ iung ka hơ dang Việt Nam truh sơ năm 2030, ka hơ dang iŏk đei truh 10 triu tân, hăm kơ sô̆ jên tĕch tơ̆ tĕh đak đe dang 14 - 16 ti USD. Tơ drong đei măt păng vang bơ̆ jang đơ̆ng kon pơ lei jang ka tơ̆ dôm tơ ring đak dơ sĭ hlôi chă đei tơ drong jang ăn dang 1 triu ‘nu kon pơ lei păng 4 triu ‘nu bơ ngai đei ƀơm truh; vang tơ gop pơm hơ tŏk anih jang ka hơ dang, hơ tŏk tơ drong arih xa ăn kon pơ lei, atŏk tơ iung mŭk drămn tơ pôl kơ tĕh đak, tơ gop gĭt kăl vă vei sơ đơ̆ng, kơ jăp tơ drong pơm tơm tơ̆ đak dơ sĭ kơ tĕh đak.

Dơ̆ng: Tơ blơ̆