VOV4.Bahnar - ‘Năr 3/6, tơ̆ Anih jang kơ Khul kơ dră tĕh đak, hăm tơ drong pơ gơ̆r đơ̆ng Thủ tướng Phạm Minh Chính, Khul kơ dră tĕh đak hop akŏm khei 5/2021.

Thủ tướng Phạm Minh Chính pơ gơ̆r hop akŏm Khul kơ dră tĕh đak khei 5/2021

Lơ̆m hop akŏm, mơ̆ng hla ar chih tơ roi păng pơ ma nuh găh tơ drong tang găn jĭ COVID-19; hơ len năng tơ drong jang mŭk drăm, tơ pôl, jên thu mong, tơ lĕch jang kơ tĕh đak khei 5 păng 5 khei sơ năm 2021; hla ar chih tơ roi găh tơ drong jang mŭk drăm, tơ pôl, jên thu mong, tơ lĕch jang kơ tĕh đak 6 khei blŭng sơ năm 2021 păng dôm trong vă jang lơ̆m 6 khei hơ tuch sơ năm 2021; hơ len năng dôm tơ drong tơ lĕch jên jang kơ tĕh đak đei khei ‘năr đunh păh lăp đơ̆ng 2016 - 2020 păng trong vă tơ mât jên jang tĕh đak đơ̆ng 2021-2025.

Pơ ma ƀât blŭng hop akŏm, Thủ tướng Phạm Minh Chính akhan, hop akŏm Khul kơ dră tĕh đak khei 5 đei pơ gơ̆r ƀât mă jĭ COVID-19 oei tơ pŏh tôch hơ mơt, tơ pŏh hrĕnh ƀiơ̆, xă ƀiơ̆, kơ loăi virus roi hơ mơt ƀiơ̆ păng tơ pŏh truh tơ̆ dôm tơ ring jang kơ măy, anih hơ kŭm krao khan. Thủ tướng athei dôm bơ ngai tang măt vang hop akŏm pơ ma nuh ‘moi kiơ̆ jơ hngâm đon: tơ chĕng mă hơ len, pơ ma mă tơ pă, jang mă ‘lơ ‘lŏ, đei yoa tơ pă; kon pơ lei jang kiơ̆ ‘lơ ‘lŏ. Kiơ̆ đơ̆ng noh hơ len năng rim tơ drong vă tơ lĕch trong bơ̆ jang đei yoa tơ̆ hơ năp kơnh.

Dơ̆ng: Tơ blơ̆