VOV4.Bahnar - ‘Năr 19/8, Thủ tướng Phạm Minh Chính pơ gơ̆r hop akŏm trư̆k tuyê̆n lơ̆m tĕh đak găh tơ drong tơ proh hơ met hơ drol. Thủ tướng athei rim Bí thư, Kơ dră vei lăng kon pơ lei dôm dêh char oei bơ̆ jang kiơ̆ trong pơ gang găn lơ̆m tơ pôl hơ nơ̆ng bơ̆ jang mă ‘lơ̆ng, dôm dêh char ưh đei pơ vang găn lơ̆m tơ pôl ‘nŏh athei pơ truh khul jang năm tơ gŭm ăn dôm dêh char găh pơ băh, kăl loi hlŏh ‘nŏh hơ tŏk khul bơ ngai jang rơ gei vă hơ met ăn dôm bơ ngai jĭ ăl. Thủ tướng krao hơ vơn dôm tơ ring hơ tŏk đon tơ gŭm băl; pôk pơ ư dôm tơ drong vang tơ gŭm bơ̆n tơ mam drăm ăn dôm dêh char, plt găh Pơ băh.

Jơ hop akŏm tơ̆ Anih pơih pơ dăh tơm lơ̆m Anih jang kơ Khul kơ dră tĕh đak

Pơ ma pơ tôch hop akŏm, Thủ tướng Phạm Minh Chính athei dôm anih jang kơ pal hơ nơ̆ng chih iŏk nơ̆r pơ ma đơ̆ng dôm tơ ring păng dôm tơ ring athei chih iŏk nơ̆r pơ ma đơ̆ng anih jang kơ pal ‘năi vă jang hơ doi vang tơ lĕch trong tơ proh hơ met hơ drol. Tơ drong tơ proh hơ met hơ drol athei jang hơ drol 1 hơ yak, tơ prŏh mă tôm, mă rơ đăh kiơ̆ luơ̆t Tơ proh hơ met đơ̆ng Kuô̆k hô̆i, ‘moi kiơ̆ dôm tơ drong pran ‘lơ̆ng tơ̆ rim tơ ring, anih jang kơ pal vă gơ̆h jang tŏk pran kơ jăp. Đei trong tơ prŏh hơ met hơ drol ‘lơ̆ng ‘mơ̆i gơ̆h đei tơ drong jang ‘lơ̆ng, đei bơ ngai tơ mât jên jang lơ, iŏk yoa ‘lơ̆ng jên tơ mât jang kơ tĕh đak, atŏk tơ iung đei mŭk drăm, tơ pôl.

Dơ̆ng: Tơ blơ̆