VOV4.Bahnar - Kơ sơ̆ 5/12, Thủ tướng Phạm Minh Chính pơ gơ̆r hôp trư̆k tuyê̆n Khul kơ dră chĕp kơ̆l tĕh đak hăm 8 dêh char găh Pơ băh Tơ ring Tŏk bŏk păng Tây Nguyên găh tơ drong tang găn, hơ met pơ ‘lơ̆ng hiong răm đơ̆ng ‘mi tih đak lơ̆p. Truh akŏm tơ̆ dôm anih pơih pơ dăh kơ dôm dêh char Thừa Thiên Huế, Quảng Nam, Quảng Ngãi, Bình Định, Phú Yên, Khánh Hòa, Gia Lai, Dak Lak đei kơ dră vei lăng kon pơ lei dêh char păng kơ dră dôm anih jang kơ pal đei ƀơm truh.

Pơ ma lơ̆m hop akŏm, Thủ tướng Phạm Minh Chính ăn tơ băt, khei ‘năr âu ki, đei ‘mi tih đak lơ̆p, pơm hiong răm lơ găh bơ ngai păng tơ mam drăm, ƀa hơ ƀo...tơ̆ 8 dêh char găh Pơ băh tơ ring Tŏk bŏk păng Tây Nguyên. Khul kơ dră tĕh đak pơ tho păng ăn khul jang mât tơ̆ dôm dêh char lơ̆m tơ ring vă kŭm hăm tơ ring tang găn, hơ met pơ ‘lơ̆ng hiong răm đơ̆ng ‘mi tih, đak lơ̆p.

Truh âu kơnh, Thủ tướng athei hơ met pơ ‘lơ̆ng mă hrĕnh tơ drong răm đơ̆ng ‘mi tih đak lơ̆p, kăl loi ‘nŏh hơ met pơ ‘lơ̆ng cham char, khul linh dân quân du kích hơ met rơ gŏh hnam trưng, anih jang pơ gang, pôi hơ met râm rĕk, kon tơ rong lôch, pruih pơ gang pơ lôch pơ rang jĭ. 8 dêh char athei băt hơ dăh rim tơ drong, jăh hơ met pơ ‘lơ̆ng hiong răm, tơ iung dơ̆ng tơ drong jang xa, vei sơ đơ̆ng tơ drong arih xa ăn kon pơ lei păng vang tang găn ‘lơ̆ng tơ drong jĭ.

Dơ̆ng: Tơ blơ̆