VOV4.Bahnar - Pơ gê 8/7, tơ̆ hơ năp tơ drong krê hơ mơt, jĭ Covid-19 oei tơ pŏh tôch hrĕnh tơ̆ plt Hồ Chí Minh, đơ̆ng rŏng kơ drơ̆ng kiơ̆ nơ̆r athei đơ̆ng plt tơ mât yoa Tơ drong tơ chơ̆t 16, Thủ tướng Phạm Minh Chính pơ gơ̆r hop akŏm trư̆k tuyê̆n Khul kơ dră tĕh đak hăm kơ dră chĕp kơ̆l plt Hồ Chí Minh vă pơ ma nuh, drơ̆ng nơ̆r ăn trong jang păng krao hơ vơn kon pơ lei tơ̆ plt vang jang kŭm hăm đĭ đăng anih jang chinh trĭ vă tang găn jĭ COVID-19 đei yoa ‘lơ̆ng.

Thủ tướng tơ chĕng ‘lơ̆ng tơ drong adrin đơ̆ng plt HCM, tơ drong chĕp kơ̆l pơ gơ̆r đơ̆ng anih jang đảng, khul kơ dră pơ gơ̆r jơ̆p tơ ring. Mă lei truh dang ei jĭ Covid-19 tơ̆ plt oei tơ pŏh tôch hơ mơt, găn tôch hơ nat. Kiơ̆ nơ̆r athei đơ̆ng plt, Khul kơ dră chĕp kơ̆l tĕh đak, Thủ tướng tĕh đak drơ̆ng nơ̆r jang kiơ̆ dôm trong jang kơ hret ƀiơ̆, bơ̆ jang kiơ̆ tơ drong tơ chơ̆t 16 pơ vang găn, ưh ăn yak vih vât lơ̆m plt HCM 15 năr vă tang găn, hơ met klăih jĭ tơ̆ plt HCM.

Thủ tướng pơ ma hơ dăh, bơ̆ jang pơ vang găn, ưh ăn yak vih vât mă lei athei pơm thoi yơ vă huei pơm kơ nê̆ truh tơ drong arih xa kơ kon pơ lei, athei vei lăng ‘lơ̆ng tơ drong sơ đơ̆ng, năng jơ hngâm pran, tơ drong arih kơ kon pơ lei kăl hlŏh. Tơ gŭm ăn tơ drong tang găn jĭ Covid-19, păng pơ truh vaccine ăn plt HCM adrol.

Dơ̆ng: Tơ blơ̆