VOV4.Bahnar - ‘Năr 9/5, Thủ tướng teh đak Phạm Minh Chính hlôi năm hơ len lăng tơ drong jang tang găn jĭ tơ̆ rim dêh char tơ ring sơ lam pơ mơ̆t pơ băh păng pơ gơ̆r ‘măng hop akŏm trực tuyến hăt hot đơ̆ng anih pơ dăh ti ti tơm Anih vei lăng kon pơ lei dêh char An Giang hăm Anih pơ gơ̆r jang teh đak tang găn jĭ COVID-19, mĭnh ƀar 1 anih tơm anih jang păng kơ dră chĕp kơ̆l 6 dêh char tơ ring sơ lam pơ mơ̆t pơ băh. Lơ̆m 10 năr âu ki lơ̆m teh đak hlôi đei 257 ‘nu jĭ COVID-19 lơ̆m tơ pôl. Kiơ̆ hơ len lăng ăn ƀôh lơ dêh char oei đei pơm pơ hơi, ư̆h kơ chăng ƀơ̆t tam mă đei ƀôh jĭ tơ̆ tơ ring, mă lei truh ƀơ̆t jĭ đei ƀôh ‘noh hli tăr văr, pơm kiơ̆ lơ trong tang găn hloh tơ drong. Pơ tôch ‘măng hop akŏm, Thủ tướng Phạm Minh Chính pơ ma hơ dăh tơ dăh jĭ đei ƀôh jơ̆p lơ̆m teh đak gô ƀơm kơ nê̆ truh tơ drong sơ đơ̆ng chinh trĭ, jơ hngơ̆m jăn kon pơ lei, ‘măng pôk rơ̆ih Quốc hội păng Jơ nŭm pơ gơ̆r kon pơ lei rim tơ ring, tơ drong pơ tôch sơ năm hŏk 2020-2021 hiong răm gô ư̆h kơ băt liơ. Yua thoi noh, rim tơ ring, anih jang hơ nơ̆ng tang găn jĭ, hơ met ‘lơ̆ng hiong răm, vei kơ jăp sơ đơ̆ng chĭnh trĭ, sơ đơ̆ng tơ pôl hăm jơ hngơ̆m đon pơ gơ̆r “hrĕnh, hrĕnh hloh dơ̆ng; hơ drin, hơ drin hloh dơ̆ng, kơ tang, kơ tang hloh dơ̆ng, đei yua, đei yua hloh dơ̆ng, jơ nei, jơ nei hloh dơ̆ng”.

Thuem: Tơ blơ̆