VOV4.Bahnar - Ƀlep ƀât Têt so Chôl Chnăm Thmây sơ năm 2021 kơ kon pơ lei Khmer, Thủ tướng tĕh đak Phạm Minh Chính hlôi pơ truh kơ thơ chơt hơ iă truh hăm kon pơ lei păng đe ƀok chuơ bơ ngai Khmer. Tang măt ăn Kơ dră chĕp kơ̆l Đảng, tĕh đak, Thủ tướng đei nơ̆r jet gia, pơ ma nuh, pơ truh nơ̆r hơ iă păng hơ pơi ‘mĕh dôm tơ drong ‘lơ̆ng hlŏh truh hăm kon pơ lei păng đe ƀok chuơ bơ ngai Khmer.

Ƀât mă tơ drong jĭ COVID-19 oei tôch hơ mơt, Thủ tướng lui hăm đon adrin đơ̆ng rim anih jang kơ pal păng kon pơ lei, mih ma duch nă bơ ngai Khmer gô sơng Têt Chôl Chnăm Thmây sơ đơ̆ng ‘lơ̆ng, hăm lơ tơ drong jŏh ayŏ kơ dŏ xoang ‘lơ̆ng hơ iă, chĕp vei kơ jăp dôm tơ dỏng juăt ‘lơ̆ng đơ̆ng sơ̆ đơ̆ng kơ dih. Atŭm hăm ‘nŏh, hơ nơ̆ng tơ iung jơ hngâm đon ‘mêm kơ tĕh đak, tơ guăt 1 ƀơ̆r đon, adrin hŏk pơ hrăm, hơ tŏk jơ hngâm pran păng đon rơ gei, pơ nam jang xa, khŏm iŏk đei lơ tơ dỏng jơ nei tih ƀiơ̆, tơ gop kŭm hăm tĕh đak jang đei dôm tơ drong tơm vă atŏk tơ iung mŭk drăm, tơ pôl hlôi tơ lĕch.

Dơ̆ng: Tơ blơ̆