VOV4.Bahnar - Pơgê năr 30/8, tơ̆ Hà Nội pơgơ̆r Hop akŏm tơgop nơ̆r trong pơjing Hla bơar chĭh tơbăt Pơtôch jang kiơ̆ Tơdrong tơchơ̆t kơsô̆ 19-NQ/TW kơ Hop akŏm ‘măng mă 6, Khŭl kơdră chĕp pơgơ̆r Trung ương jăl XI găh hơnơ̆ng tơplĭh ‘nao, pơjing hơyak kơtang vă trŭh sơnăm 2020 tĕh đak bơ̆n jing tĕh đak jang kmăi kmŏk.

Thủ tướng pơm tơm Hop akŏm găh trong jang, khôi luơ̆t đei ƀơm trŭh groi tĕh

Iung pơma tơ̆ pơgơ̆r blŭng a Hop akŏm, Thủ tướng Phạm Minh Chính, Kơdră Dơnŏ anih chĕp pơgơ̆r pơma hơdăh: Đơ̆ng rŏng vă jê̆ 10 sơnăm jang kiơ̆ Tơdrong tơchơ̆t kơsô̆ 19-NQ/TW, bơ̆n hlôi iŏk đei jơne gĭty kăl lơ̆m atŏk tơ iung dôm trong jang đơ̆ng groi tĕh ăn atŏk tơ iung mŭk drăm-tơpôl, tơgop sơđơ̆ng hơtŏ hơnơ̆ng păng sơđơ̆ng, vei lăng tĕh đak,sơđơ̆ng dơ̆ng kơ jăp; vei lăng cham char păng trŏ lăp hăm tơplĭh tŏ ‘mi kial. Mă lei lơ̆m khei ‘năr jang kiơ̆ oei đei lơ tơdrong jang tim mă ‘lơ̆ng. Kơ yuơ lơ lŏh, Ban Bí thư hlôi tơlĕch Tơdrong tơchơ̆t pơjing Dơnŏ anĭh chĕp pơgơ̆r pơgơ̆r hop akŏm pơtôch 10 sơnăm jang kiơ̆ Tơdrong tơchơ̆t 19-NQ/TW. Thủ tướng athei rim kơdră tang măt akŏm chă pơma dơnŭh lơ̆m dôm tơdrong iŏk đei jơnei, dôm tơdrong jang tim mă hơ iă păng tơdrong tơm pơm ăn lơ̆m khei ‘năr jang kiơ̆ Tơdrong tơchơ̆t 19-NQ/TW, mă kăl dôm tơdrong ư̆h kơ chăng.

Tơbkơ̆ nơ̆r: Amazưt