VOV4.Bahnar - Pơgê năr 15/8, Thủ tướng Tĕh đak Phạm Minh Chính pơm tơm Hop akŏm trư̆k tuyên pơtôch bơ̆ jang tang găn jĭ Covid-19 hăm rim dêh char, pơlei tơm tŏk bŏk jang kiơ̆ ăn oei hơtăih dĭh băl kiơ̆ Nơ̆r athei jang kiơ̆ 16/CT-TTg păng tơlĕch jang kiơ̆ Tơdrong tơchơ̆t 86/NQ-CP đơ̆ng Khŭl kơdră Tĕh đak găh rim trong jang kăl tang găn jĭ Covid-19.

Rup hop akŏm

Iung pơma tơ̆ hop akŏm, Thủ tướng Phạm Minh Chính pơma hơdăh, khei năr au ki, tơdrong jang kiơ̆ Nơ̆r athei jang kiơ̆ 16 đơ̆ng Thủ tướng tĕh đak, rim dêh char, pơlei tơm hlôi jang ‘lơ̆ng. Thủ tướng pơma hơdăh, tơdrong jĭ jăn tôch hli hlơt, đei tơring jĭ tôch kơtang. Trong jang oei hơnơ̆ng jang ‘nŏh “tang găn jĭ nhen tang găn hơyăt” hơvơn pơ đĭ khŭl chinh trĭ, đĭ đăng kon pơlei vang tang găn jĭ. Thủ tướng pơma hơdăh, kăl ƀet bơ̆ng đĕch vaccine ăn pơ đĭ kon pơlei. Dơnŏ anĭh tơm vei lăng jang pơgang ‘noh hơnih chiu pŭ lơ̆m bơ̆ jang hơlen pơgang ‘lơ̆ng, ăn asong, vei lăng; ư̆h kơ gơ̆h pơgơ̆r ƀet iŏk jên, bơngaoi bu ƀet iŏk jên ‘nŏh tơbrar hloi. Rim dêh char, pơlei tơm tŏk bŏk jang kiơ̆ Nơ̆r athei jang kiơ̆ 16 kăl tơlĕch jang hơdrol lơ̆m tang găn jĭ, tơ̆ yơ sơđơ̆ng ‘nŏh iung jang sa atŏk tơ iung mŭk drăm hloi.

Tơblơ̆ nơ̆r: Amazưt