VOV4.Bahnar - Tơ\ An^h jang kơ Khul kơ dră te\h đak, Thủ tướng Nguyễn Xuân Phúc sơng Bơ ngai tang măt ăn Liên Hiệp Quốc tơ\ Việt Nam Kamal Malhotra. Thủ tướng tơ che\ng ‘lơ\ng tơ drong jang đơ\ng bơ ngai tang măt ăn LHQ tơ\ Việt Nam lơ\m tơ drong roi tơ băt, tơ gu\m ăn Việt Nam jang to\k lơ\m khei ‘năr âu ki.

Thủ tướng Sơng Bơ ngai tang măt ăn Liên Hiệp Quốc tơ\ Việt Nam

Hôn bơ nê LHQ jang hơ doi, tơ gu\m ăn Việt Nam tang găn j^ Covid-19, Thủ tướng pơ ma hơ dăh, Khul kơ dră te\h đak Việt Nam bơ\ jang tơ păt ‘lơ\ng, tơ tom vă tang găn j^ Covid-19; Việt Nam hlôi krao ako\m rim an^h jang chinh tr^ vang bơ\ jang, truh dang ei hlôi hơ met klăih ăn 16 ‘nu bơ ngai j^ Covid-19.

Pơ ma truh tơ drong jang đơ\ng te\h đak jang pơ lơ\h lơ\m Jơ nu\m vei lăng sơ đơ\ng Liên Hợp Quốc đơ\ng Việt Nam đơ\ng blu\ng sơ năm truh dang ei, Thủ tướng akhan, lơ\m khei pơm Kơ dră, Việt Nam hlôi pơ gơ\r đang ‘lơ\ng lơ tơ drong, kiơ\ đơ\ng noh tơ guăt hăm tơ drong jang pơm Kơ dră ASEAN hai. Lơ\m rim tơ drong, Việt Nam vang jang tôch tơ năp, kơ chăng, hăm trong jang tơ bôl kơ dih, ‘moi kiơ\ dôm tơ drong hơ găt pơ jing păng jang tơ năp yoa tơ drong đei yoa atu\m, yoa tơ drong rơ ngei, sơ đơ\ng tơ\ dôm tơ ring...

Dơ\ng: Tơ blơ\