VOV4.Bahnar - Kơ sơ̆ 18-3, tơ̆ anĭh jang kơ Khul kơ dră tĕh đak, Thủ tướng Nguyễn Xuân Phúc sơng Khul jang pơm hơ tŏk tơ drong jang hơ doi mŭk drăm Việt Nam - ASEAN. Tơ̆ jơ tơ ƀât, bơ ngai tang măt dôm anĭh tĕch mơ dro jang lơ̆m Khul pơm hơ tŏk tơ drong jang hơ doi mŭk drăm Việt Nam - ASEAN tơ ƀôh đon bơ nê tơ drong tơ rĕk, tơ gŭm đơ̆ng Khul kơ dră tĕh đak, dôm anĭh tơm, anĭh jang kơ pal păng tơ ring tơ rang khei ‘năr âu ki; tơ chĕng ‘lơ̆ng tơ drong Khul kơ dră tĕh đak tang găn đei jĭ Covid-19, gơ nơm thoi noh mă gơ̆h jang xa, tĕch mơ dro sơ đơ̆ng ‘lơ̆ng hrei ‘nâu.

Thủ tướng pơ ma hơ dăh, Đảng, tĕh đak ling lang pơ jing tơ drong ‘lơ̆ng ăn kon pơ lei, anĭh tĕch mơ dro jang tŏk, pơih xă tơ drong jang xa, vei lăng tơ drong đei yoa tơ găl đơ̆ng kon pơ lei, anĭh tĕch mơ dro. Thủ tướng hơ pơi ‘mĕh dôm anĭh tĕch mơ dro pơ ma atŭm, dôm Khul pơm hơ tŏk tơ drong jang hơ doi mŭk drăm Việt Nam - ASEAN pơ ma adrô̆, năng kăl truh tơ drong jang tŏk rơ gŏh, tĕch mơ dro tơ păt ‘lơ̆ng, vei lăng cham char arih, tang găn xa pơ jĭp, dôm tơ drong ưh kơ ‘lơ̆ng.

Dơ̆ng: Tơ blơ̆