VOV4.Bahnar – Kơsơ̆ năr 21/6, Thủ tướng teh đak bơ̆n Phạm Minh Chính pơgơ̆r tơdrong hop akŏm trư̆k tuyê̆n hăm 32 tơring găh tơdrong jang tang găn păng tơjră pơrang jĭ COVID-19. 'Nâu jing dôm tơring tŏk bŏk oei hơbuh pơrang jĭ dăh mă dôm anih jang kŏng ngĭp, anih pơm tơlĕch tơmam drăm. Thủ tướng teh đak Phạm Minh Chính xơkơ̆t, pơrang jĭ pơtoi hơbuh hli hlơt, tơnap kơ hơlen. Minh 'măng dơ̆ng Thủ tướng tơbăt, pơrang jĭ hơbuh lai yơ, tơ̆ anih yơ ưh kơ băt noh ưh gơh pơhơi pơhŏ. 'Măng mă âu, anih jang chĭnh trĭ tơ̆ tơring athei pơm jang kơtang hloh, mă kăl noh athei băt hơdăh tơ̆ tơring. Vei hơlen tơring, jang atŭm kơjăp hloh, kŏng ang, khul linh, khul juăt jang vă jang tơnăp tơdrong pơkăp tơklăh oei pha, vei xơđơ̆ng tơpôl, xơđơ̆ng tơdrong erih kon pơlei. Thủ tướng ră hơdăh, tơchơ̆t jang hadoi noh tơnap tap. Mă lei tơnap duh athei yak hloh, găn hloh vă xơkơ̆t dơh po, đei tơdrong hlôh vao vă pơgơ̆r jang. Tơguăt hăm tơdrong đei ƀôh, hơlen tơnăp dôm tơdrong tơchơ̆t jang, hơ 'nhăk đon lui ăn kon pơlei, tơlĕch lơ trong jang tơnăp jang đei jơnei.

Lan chih păng pơre nơ̆r