VOV4.Bahnar  – Năr 19/5, Thủ tướng teh đak bơ̆n Phạm Minh Chính hlôi bơ̆ jang hăm Anih tơm Axong jang – Linh jĭ rơka păng Tơpôl. Pơma ăh jơ bơ̆ jang, Thủ tướng Phạm Minh Chính ră hơdăh pơkăl athei jang khŏm mă đei tơdrong pơkăp hơtŏk mŭk drăm yak hadoi hăm tơdrong rơgei hơtŏ hơnơ̆ng lơ̆m tơpôl, ưh đei "prơih lê̆" tơdrong rơgei păng hơtŏ hơnơ̆ng tơpôl vă kơdâu kiơ̆ hơtŏk mŭk drăm ƀônh ƀŏ, tơrĕk truh bơngai hin dơnuh, bơngai kue lơ̆m tơpôl. Thủ tướng duh ră hơdăh, Anih tơm oei dôm tơdrong jang tam mă keh đang tơnăp. Tơdrong kăl pơm jang vă hơtŏk tơ iung tam mă drơ̆ng minh, tam mă kiơ̆ trong 'nao, ưh đei pơkăp akŏm. Tơdrong pơm jang đơ̆ng Việt Nam oei kơđeh, tơdrong mă âu gơnơm lơ lơ̆m tơdrong mă lei lơ̆m noh đei xơnong jang đơ̆ng Anih tơm, mă hăt noh lơ̆m pơtho tơdrong jang, kơlih kon bơngai hăm tơdrong hlôh vao, gơh rơgei, tơdrong jang jing tơdrong kăl hloh vă hơtŏk pơ 'lơ̆ng pơm jang. Thủ tướng pơkăl Anih tơm Axong jang – Linh jĭ rơka păng Tơpôl pơtoi jang tơnăp dôm xơnong jang đei pơjao, lơ̆m noh akŏm pơkăp tơdrong pơm kiơ̆ Tơchơ̆t kơsô̆ 42/NQ-CP găh dôm tơdrong tơgŭm kon pơlei ƀơm tơnap tap yuơ đơ̆ng pơrang jĭ COVID-19, tơlĕch dôm trong jang trŏ ƀlep ăn jăl jang truh âu kơnh.

Lan chih păng rapor