VOV4.Bahnar – Pơma ăh Hop akŏm Khei năr anô̆ anăp kơnh châu Á yuơ Nikkei pơgơ̆r ăh năr 20/5/2021 kiơ̆ pơkăp trư̆k tuyê̆n, Thủ tướng teh đak bơ̆n Phạm Minh Chính ră hơdăh, minh châu Á hơtŏk tơ iung yuơ tơdrong rơngei xơđơ̆ng hơtŏk jơnap jing tơdrong hơpơi 'moih atŭm kơ dôm teh đak lơ̆m tơring, hơtŏ hơnơ̆ng đơ̆ng dôm teh đak, pơkăp đơ̆ng dôm Khul kơpal teh đak, tơdrong atŭm jơhngơ̆m jing tơkhuă vă pơjing minh khei năr 'lơ̆ng rŏ anô̆ anăp kơnh kơ châu Á. Đei pơtơm ăh xơnăm 1995, Hop akŏm apŭng plenh teh găh Khei năr anô̆ anăp kơnh châu Á jing minh lơ̆m dôm tơdrong hopa kŏm rim xơnăm kăp gĭt hloh tơ̆ châu Á yuơ Anih jang Nikkei (Nhật Bản) pơgơ̆r. Hop akŏm hơvơn tơdrong tơrĕk păng vang akŏm đơ̆ng Khul kơpal, tơmoi, bơngai hŏk kơjung, anih jang mŭk drăm kơ dôm teh đak châu Á duh nhen tang măt ăn dôm anih jang mŭk drăm tih hloh lơ̆m kơpal teh. Tơ̆ hopa kŏm, rim bơngai tang măt chơt hơ iă pơma đam găh dôm tơdrong đei ƀôh lơ̆m tơring; xơnong jang kăp gĭt kơ châu Á lơ̆m tơdrong jang kơ apŭng plenh teh păng dôm trong jang hơtŏk anih jang kơ tơring hăm hơnăn: “Xơkơ̆t khei năr đơ̆ng rŏng kơ COVID: Xơnong jang kơ châu Á hăm tơdrong hơmet pơ 'lơ̆ng lơ̆m kơpal teh”. Pơma ăh hop akŏm, Thủ tướng Phạm Minh Chính xơkơ̆t, Việt Nam vang jang hăm xơnong kơchăng atŭm hăm dôm teh đak hơtŏk ăn tơdrong rơngei păng tơguăt tơguăl kơyuơ tơdrong pơyua atŭm hơtŏk tơ iung jơnap kơ rim teh đak lơ̆m tơring, kơyuơ tơdrong phĭ tơtŏ dơnŏ 'lơ̆ng kơ rim kon pơlei lơ̆m kơpal teh.

Lan chih păng pơre nơ̆r