VOV4.Bahnar – Kơsơ̆ năr 28/5, tơ̆ anih jang Khul kơpal teh đak, Thủ tướng teh đak bơ̆n  Phạm Minh Chính hlôi xơng pơma dơnuh hăm ƀok Alok Sharma, Ƀô̆ trưởng teh đak Anh, Kơdră Hop akŏm ‘măng mă 26 dôm teh đak vang jang lơ̆m Tơchơ̆t đơ̆ng Liên hơp kuôk găh Hơyuh tô̆ ‘mi tơplih (COP26), tŏk bŏk oei tơmang păng bơ̆ jang tơ̆ Việt Nam. Tơ̆ jơ xơng, ƀar păh hlôi pơma đam găh lơ tơdrong hơdăh, tơpăt pơyua vă pơtoi hơtŏk jang hadoi kăp gĭt Việt Nam - Anh hơtŏk tơ iung lơ̆m khei năr apŭng plenh teh tŏk bŏk oei tơjră hăm lơ tơnap tap ‘nao, mă hăt noh găh hơyuh tô̆ ‘mi tơplih păng pơrang jĭ COVID-19.

 Thủ tướng pơkăl Khul kơpal teh đak Anh pơtoi tơgŭm Việt Nam găh jên hu, kơmăi kơmŏk, tơdrong hlôh vao lơ̆m tơdrong tơplih đơ̆ng jang mŭk drăm pơm tơlĕch hơyuh carbon păng hơtŏk tơdrong jang trŏ ƀlep kiơ̆ hơyuh tô̆ ‘mi tơplih, mă hăt noh tơ̆ dôm tơring tŏk bŏk roi năr roi pŭ răm kơtang đơ̆ng hơyuh tô̆ ‘mi tơplih păng đak dơxĭ tŏk blai. Kơdră COP26 Alok Sharma xơkơ̆t, Anh gô pơtoi tơgŭm Việt Nam lơ̆m tơjră hăm hơyuh tô̆ ‘mi tơplih, đei hloi hơtŏk tenh tơdrong hơtŏk găh pơm tơlĕch unh hơyuh xơđơ̆ng ‘lơ̆ng.

Lan chih păng pơre nơ̆r