VOV4.Bahnar  – Kơsơ̆ năr 10/5, Thủ tướng teh đak bơ̆n Phạm Minh Chính pơgơ̆r tơdrong hop akŏm đơ̆ng Anih juăt jang Khul kơpal teh đak hăm Jơnŭm pơgơ̆r jang kơ teh đak găh tang găn păng tơjră jĭ COVID-19 vă pơđăp dôm trong hơmet oei tơjruh, atŭm hăm noh tơlĕch trong jang kơtang hloh lơ̆m tơdrong tang găn păng tơjră jĭ COVID-19. Dôm nơ̆r tơgop lơ̆m hop akŏm adoi xơkơ̆t găh tơdrong tơm mă bơ̆n kĕ hơlen tơdrong đei ƀôh, mă 'măng hơbuh jĭ mă âu đei ƀôh tơpoh tenh hloh, lang xă păng hli hlơt hloh, tơnap kơ hơlen, pơrăm kơtang hloh. Mă lei mưh bơ̆n ưh đei pơtoi đei dôm trong jang kơtang, xek tơlang mă tơnăp hăm tơdrong pơhơi pơhŏ, ưh đei kơchăng dăh mă gơnơm gơnŏ, noh kơnh bơ̆n gô ƀơm răm kơtang hloh.

          Yuơ noh, Thủ tướng pơkăl athei iŏk yua dôm tơdrong tơnăp păng tơdrong hlôh vao lơ̆m tang găn păng tơjră 3 'măng pơrang jĭ hơbuh adrol âu ki, athei hơdral, băt hơdăh tơdrong đei ƀôh, hăt hot pơm kiơ̆ kơjăp dôm trong jang trŏ ƀlep, kiơ̆ tơdrong pơgơ̆r đơ̆ng Anih jang Ƀĭ thư, Thủ tướng teh đak păng Kơdră Jơnŭm pơgơ̆r jang kơ teh đak.

Lan chih păng pơre nơ̆r