VOV4.Bahnar - Kơsơ̆ năr 28/6, tơ̆ Hnam Kuô̆k hô̆i, Kơdră chĕp pơgơ̆r Kuô̆k hô̆i Vương Đình Huệ hlôi pơgơ̆r pơma dơnŭh hăm Tổng Bí thư, Kơdră chĕp pơgơ̆r tĕh đak Lào Thongloun Sisoulith. Tổng Bí thư, Kơdră chĕp pơgơ̆r tĕh đak Lào Thongloun Sisoulith hăm Kơdră chĕp pơgơ̆r Kuô̆k hô̆i Vương Đình Huệ jei akhan, ‘măng năm tơmang đơ̆ng Tổng Bí thư, Kơdră chĕp pơgơ̆r Lào ‘nŏh jing tơbăt hơdăh tơdrong hơ iă lơ̆m tơgoăt tơgoăl dĭh băl gĭt kăl păng jang hơdoi tôm tong Việt Nam-Lào. Tơ̆ hơnăp jĭ hơbuh Covid-19 tŏk bŏk pơrăm kơtang lơ̆m tơring, Việt Nam hôn bơnê kơtang rim trong jang tang găn jĭ jơnei mă tĕh đak Lào hlôi păng tŏk bŏk tơlĕch jang; pơma hơdăh, tĕh đak Lào gô hrôih tang găn kĕ jĭ hơbŭh, hơnơ̆ng jang kiơ̆ jơnei Tơdrong tơchơ̆t Pơm lê̆h hop akŏm mă 11 kơ Đảng Kon pơlei kĕch mạng Lào. Tổng Bí thư, Kơdră chĕp pơgơ̆r Lào Thongloun Sisoulith pơma hơdăh, khei năr au kơnh, Kuô̆k hô̆i ƀar tĕh đak kăl hơnơ̆ng atŏk kơtang tơdrong chă pơma dơnŭh dĭh băl, atŏk kơtang jang hơdoi, tơbăt dĭh băl trong jang hơ iă, mă kăl lơ̆m tơ iung pơ jing trong bơ̆ jang, khôi luơ̆t tĕh đak păng trong jang dăr lăng tơm bơ̆ jang kơ rim hơnĭh bơ̆ jang Tĕh đak; atŏk kơtang hlŏh dơ̆ng jang hơdoi ƀar păh rim Hơnĭh bơ̆ jang kơ ƀar Kuô̆k hô̆i lơ̆m tơdrong dăr lăng jang kiơ̆ rim tơdrong drơ̆ng mĭnh nơ̆r jang hơdoi ƀar păh ƀar tĕh đak.

– Kơsơ̆ năr 28/6, tơ̆ anih jang Khul kơpal t/đ, Thủ tướng t/đ bơ̆n Phạm Minh Chính hlôi pơma đam hăm ƀok Tổng Bí thư, kơdră t/đ Lào Thongloun Sisoulith, tŏk bŏk oei tơmang tơ̆ Việt Nam. Ƀok Tổng Bí thư, Chủ tịch nước Thongloun Sisoulith chơt hơ iă đei vih tơmang tơ̆ Việt Nam hăm kơchư̆k jang 'nao, pôk bơnê kơ dôm tơdrong đei jơnei tih tên, tôm tơdrong đơ̆ng kon pơlei Việt Nam 'nhŏng oh hlôi đei iŏk lơ̆m tơdrong jang hơtŏk mŭk drăm tơpôl păng jang hadoi lơ̆m dôm xơnăm kơ âu. Ƀar ƀok kơdră pơma đam găh dôm trong jang đei jơnei lơ̆m tơdrong tơjră pơrang jĭ Covid-19 tơ̆ rim t/đ lơ̆m khei năr âu ki. Mă ƀơm răm đơ̆ng pơrang jĭ Covid-19, ƀar păh hlôi adrin pơtoi axong khul kơpal păng pơma đam dih băl, chĕp vei tơdrong đei jơnei đơ̆ng jang hadoi ƀar păh tơ̆ rim jăl jang; jang hadoi lơ̆m tơdrong vei xơđơ̆ng tơpôl, jang mŭk drăm, tơroh trong nơnăm, pơtho pơhrăm, jang hadoi đơ̆ng dôm tơring vă hơtŏk mŭk drăm; tơmam tĕch răt kơ ƀar păh lơ̆m 5 khei blŭng xơnăm 2021 đei 570,7 trĭu đôlar, tŏk jê̆ 40% pơtêng hăm khei năr âu xơnăm 2020; dang ei Việt Nam đei 208 tơdrong axong jang tơ̆ t/đ Lào oei lơ̆m khei năr jang hăm kơsô̆ jên chih măt 5,16 tih đôlar Mih.

Tơblơ̆ nơ̆r: Amazưt - Lan