VOV4.Bahnar - Drơ̆m kơ sơ̆ ‘năr 26-8, lăp đơ̆ng rŏng kơ năm hơ len lăng tơ drong jang tang găn jĭ tơ̆ tơ ring, Thủ tướng teh đak Phạm Minh Chính Kơ dră Anih pơ gơ̆r jang kơ teh đak tang găn jĭ COVID-19 bơ̆ jang hăm pơ lei tơm Hồ Chí Minh găh tơ drong hơ tŏk loi dơ̆ng ưh kơ ăn yak vih vơ̆t lơ̆m tơ pôl păng dôm trong jang tang găn jĭ COVID-19 lơ̆m pơ lei tơm. Hơ drol ‘noh, đơ̆ng blŭng jơ pơ gê truh kơ sơ̆ năr âu mơ̆n, bơ ngai chĕp kơ̆l Khŭl kơ dră teh đak hlôi năm truh tơ̆ lơ hơ nih lơ̆m pơ lei tơm vă hơ len lăng tơ drong pơm kiơ̆ ưh kơ ăn yak vih vơ̆t, pơm lăp hăm dôm tơ drong ‘meh vă kăl hloh ăn tơ drong arih sa kon pơ lei kiơ̆ jơ hngơ̆m đon ưh kơ lê̆ bu ưh kơ măh sŏng sa, ưh kơ măh hơ băn ao hrŭk, hơ nhăk pơ vih pơ văn pơ gang truh jê̆ hăm kon pơ lei hrenh hloh hloi tơ̆ xăh, phường, thị trấn, vei sơ đơ̆ng kon pơ lei đei gơ̆h hơ met tơ tĕnh hloh, tơ̆ rim hơ nih. Pơ ma tơ̆ jơ bơ̆ jang, Thủ tướng Pham Minh Chính tơ roi hơ dăh, ‘măng  năm bơ̆ jang vă hơ len lăng tơ drong tơ lĕch jang hơ tŏk loi dơ̆ng ưh kơ ăn yak vih vơ̆t lơ̆m tơ pôl păng rim trong jang tang găn jĭ COVID-19 lơ̆m pơ lei tơm jô̆ đơ̆ng ‘năr 23/8. Thủ tướng athei rim bơ ngai tang măt pơ ma dơ nuh, hơ len lăng dôm trong jang hlôi tơ lĕch ăn, tơ dăh dôm trong jang âu ƀlep, tơ pă hăm yan âu, ‘lơ̆ng ‘noh pơ gơ̆r jang kiơ̆ pran kơ tang, đei iŏk yua hloh, tơ mơ̆t dơ̆ng jang pơ keh dar deh rim tơ drong đei ƀôh lơ̆m yan âu.

Thuem: Tơ blơ̆