VOV4.Bahnar - Kơ sơ̆ ‘năr 5/9, Thủ tướng teh đak Phạm Minh Chính, Kơ dră Anih pơ gơ̆r jang kơ teh đak tang găn jĭ COVID-19 hlôi pơ gơ̆r hôp trực tuyến lơ̆m teh đak Anih pơ gơ̆r jang kơ teh đak tang găn jĭ COVID-19 hăm rim tơ ring găh tơ drong jang tang găn jĭ COVID-19. ‘Măng hôp đei pơ̆ih truh hloh 9.000 hơ nih pơ dăh ti vi tơ̆ rim xăh, phường, thị trấn; quận, apŭng, thị xã; dêh char, pơ lei tơm lơ̆m teh đak. Thủ tướng pơ ma hơ dăh, ‘măng hôp iŏk tơ drong tơm pơ ma dơ nuh tơ drong jang tang găn jĭ tơ̆ xăh, phường, thị trấn păng tơ roi jrŭ truh tơ drong mưh ưh kơ ăn yak vih vơ̆t lơ̆m tơ pôl ‘noh xăh, phường, thị trấn athei pơm kiơ, kon pơ lei athei pơm kiơ. Tơ roi tơ băt tơ̆ ‘măng hôp, Kơ dră tơm vei lăng găh jang pơ jang Nguyễn Thanh Long tơ băt, tơ drong jĭ hơ buh đei ƀôh tôch kơ krê hơ mơt, ‘măng jĭ mă 4 pơ tơm đơ̆ng ‘năr 27/4/2021 truh ‘năr 5/9/2021, chih iŏk hloh 520 rơ bâu ‘nu jĭ, vă jê̆ 289 rơ bâu ‘nu đĭ klăih kơ jĭ (55%) păng vă jê̆ 13 rơ bâu ‘nu lôch; đĭ lơ̆m teh đak hlôi ƀet vắc xin đei hloh 21.500.000 kơ liêu, đei vă jê̆ 30% kơ sô̆ bơ ngai đơ̆ng 18 sơ năm tơ̆ kơ pal. Tơ drong pơ gơ̆r jang kiơ̆ oei jing tơ drong tơm, mă loi ‘noh jĭ tơ̆ 1,2 tơ ring. Tơ̆ ‘măng hôp, Thủ tướng athei bơ̆ jang ưh kơ ê hăm lơ kơ dră chĕp kơ̆l xăh, phường, quận, apŭng đei ƀôh jĭ hơ buh krê hơ mơt lơ̆m teh đak. Bơ ngai chĕp kơ̆l khŭl kơ dră teh đak hơ nơ̆ng hơ len lăng bơ ngai chĕp kơ̆l tơ ring băt kơ jăp truh dang yơ găh tơ drong jĭ, trong jang tang găn jĭ, rim tơ drong jang pơ gơ̆r đơ̆ng Trung ương păng hơ nơ̆ng tơ lĕch ăn dôm nơ̆r apĭnh găh tơ drong jang hơ met bơ ngai jĭ F0, tơ drong jang pơ gang, hơ len lăng, vei sơ đơ̆ng tơ drong arih sa tơ pôl.

Thuem: Tơ blơ̆