VOV4.Bahnar - Kơsơ̆ năr 1/11, tơ̆ tĕh đak Anh, Thủ tướng Tĕh đak Phạm Minh Chính vang hop akŏm păng iung pơma lơ̆m năr blŭng kơ Hop akŏm joăt joe găh tŏ ‘mi kial đei pơgơ̆r lơ̆m Hop akŏm mă 26 rim pang vang jang kiơ̆ Tơdrong Pơkăp kơ Liên Hợp Quốc găh Tơplĭh tŏ ‘mi kial (COP26). 

Thủ tướng Tĕh đak Phạm Minh Chính iung pơma tơ̆ hop akŏm

Thủ tướng pơma hơdăh, iung tơ jră tang găn tơplĭh tŏ ‘mi kial, hơmet pơ ‘lơ̆ng cham char kăl đei jing tơdrong iung jang hơdrol hlŏh lơ̆m rim tơdrong tơchơ̆t jang atŏk tơ iung, jing tơdrong pơkăp jơhngơ̆m đon ‘lơ̆ng kơ rim Khŭl kơdră, rim hơnĭh jang, rim hơnĭh mơdro sa păng kon pơlei. Thủ tướng jei akhan, rim trong iung jang kăl ‘moi kiơ̆ cham char păng lăng kon bơngai ‘nŏh tơm hlŏh, ư̆h kơlê̆ đei bơngai bu hơchăng tơ̆ rŏng. Pơtôch nơ̆r pơma, Thủ tướng sơkơ̆t hơdăh, Việt Nam tŏk bŏk kơrŭn đĭ jơhngơ̆m vă mĭnh păh tơ jră tang găn hăm tơplĭh tŏ ‘mi kial, mĭnh păh atŏk tơ iung mŭk drăm vă atŏk tơ iung, vei lăng sơđơ̆ng tơdrong erĭh sa roi năr roi ‘lơ̆ng ăn kon pơlei. Việt Nam hơpơi ‘mĕh vă atŏk kơtang jang hơdoi hăm apŭng plĕnh tĕh lơ̆m rim tơdrong jang, trong vă jang tơmơ̆t jên jang păng atŏk tơ iung kơ jăp ‘lơ̆ng lơ̆m khei năr kơnh.

Tơblơ̆ nơ̆r: Amazưt