VOV4.Bahnar - Năr 17/5, tơ̆ Hơnĭh bơ̆ jang Khŭl kơdră tĕh đak, Thủ tướng Tĕh đak Phạm Minh Chính krao điên thoăi pơma đam hăm Thủ tướng Nhật Suga Yoshihide. Lơ̆m tơdrong tơgoăt tơgoăl ‘lơ̆ng hơ iă, lui kiơ̆ dĭh băl kơ tang păng jang sa hơdoi, ƀar Thủ tướng hơlen tơdrong tơgoăt tơgoăl dĭh băl Việt Nam – Nhật Bản hlôi păng tŏk bŏk atŏk tơ iung tôch ‘lơ̆ng hơ iă, adoi chă pơma dơnŭh rim trong jang hơdăh pơtrŭt kơtang jang hơdoi gĭt kăl hlŏh dơ̆ng kơ Việt Nam-Nhật Bản lơ̆m khei năr kơnh.

Ƀar Thủ tướng drơ̆ng mĭnh nơ̆r atŏk kơtang pơma dơnŭh dĭh băl gĭt kăl ƀar păh rim hơnĭh tơm, hơnĭh bơ̆ jang, tơring, jang hơdoi kơ jăp vă hơmet pơ ‘lơ̆ng dôm tơdrong đei lơ̆m tơgoăt tơgoăl ƀar tĕh đak; pơgơ̆r rim tơdrong jang tơbăt 50 sơnăm năr pơjing tơbôl Việt Nam- Nhật Bản lơ̆m sơnăm 2023 tơgoăl hăm tơdrong tơgoăt tơgoăl jang sa hơdoi gĭt kăl ƀar tĕh đak. Ƀar ‘nu Kơdră chĕp pơgơ̆r jei pơma dơnŭh găh rim tơdrong lơ̆m tơring păng lơ̆m apŭng plĕnh tĕh mă ƀar păh lăng trŭh, lơ̆m au đei tơdrong Biển Đông; drơ̆ng mĭnh nơ̆r jang hơdoi kơ jăp hlŏh dơ̆ng tơ̆ rim ‘măng hop akŏm lơ pang, mă kăl ‘nŏh tơ̆ Liên hợp quốc, ASEAN.

Tơblơ̆ nơ̆r: Amazưt