VOV4.Bahnar - Kơsơ̆ năr 12/7/2021, Thủ tướng Tĕh đak Phạm Minh Chính krao điên thoăi pơma dơnŭh hăm Thủ tướng Tĕh đak Israel Naftali Bennett. Thủ tướng Naftali Bennett hôn bơnê kơtang rim tơdrong jang iŏk đei jơnei kơ Việt Nam lơ̆m khei ‘năr au ki lơ̆m tang găn jĭ Covid-19, adoi nhen lơ̆m atŏk tơ iung mŭk drăm-tơpôl păng jang tơbôl. Ƀok sơkơ̆t hơdăh, Israel lăng kơ jăp atŏk kơtang hlŏh dơ̆ng tơgoăt tơgoăl jang hơdoi lơ tơdrong jang hăm Việt Nam. Thủ tướng Tĕh đak Phạm Minh Chính hmach bơnê ăn kơ ƀok Naftali Bennett đei pôk tơmơ̆t pơm Thủ tướng Tĕh đak Israel. Lơ̆m đei pơrang jĭ vil hle pơm ăn tơdrong jĭ hơbŭh Covid-19 roi năr roi kơtang, Thủ tướng Phạm Minh Chính ‘mĕh vă ƀar păh iung jang hơdoi kơ jăp lơ̆m tang găn jĭ Covid-19. Ƀar Thủ tướng drơ̆ng mĭnh nơ̆r jang hơdoi kơ jăp lơ̆m lơ tơdrong kơ ƀar tĕh đak roi kơ jăp hlŏh dơ̆ng, jơnei hlŏh dơ̆ng; pơtrŭt kơtang pơma đam, kĭ tơchơ̆t Tơdrong Tơchơ̆t mơdro sa hiôk hian păng Tơdrong tơchơ̆t jang hơdoi tơdrong jang ƀar tĕh đak; tơlĕch ăn trong jang kơtang hlŏh dơ̆ng tơmơ̆t jên jang, mơdro sa kơ ƀar păh, lăng trŭh hơmet pơ ‘lơ̆ng kơ jăp ‘lơ̆ng đơ̆ng rŏng jĭ hơbŭh.

Tơblơ̆ nơ̆r: Amazưt