VOV4.Bahnar - Kơsơ̆ năr 3/11, Pơm lê̆h sơng Thủ tướng Phạm Minh Chính atŭm hăm Khŭl kơdră tang măt Việt Nam năm tơmang tĕh đak Phalăng hlôi đei pơgơ̆r tơ̆ Hơnĭh bơ̆ jang tơm Invalides tơ̆ Hơnĭh tơm Paris. Lăp đơ̆ng rŏng pơm lê̆h sơng, Thủ tướng Tĕh đak Phạm Minh Chính hlôi pơma dơnŭh hăm Kơdră chĕp pơgơ̆r Thượng viện Phalăng Gérard Larcher.

Thủ tướng Tĕh đak Phạm Minh Chính năm tơmang tĕh đak Phalăng

Kơdră chĕp pơgơ̆r Thượng viện Phalăng tơbăt jơhngơ̆m đon hôn bơnê kơ tơdrong Việt Nam hlôi iŏk đei jơnei lơ̆m tơdrong jang hơmet ming jang mŭk drăm, vei kơ jăp atŏk tơ iung tĕnh koăng, mă lei adoi oei vei kơ jăp trong jang, oei sa joăt joe kơ hơdrĕch hơdrung kơdĭh. Thủ tướng Phạm Minh Chính hôn bơnê dôm tơdrong tơgop gĭt kăl đơ̆ng hơnĭh bơ̆ jang nghĭ viên ƀar tĕh đak lơ̆m hơmet pơ ‘lơ̆ng tơgoăt tơgoăl jang hơdoi lơ tơdrong Việt Nam-Phalăng. Ƀar păh jei pơma dơnŭh mĭnh ƀar tơdrong lơ̆m tơring păng apŭng plĕnh tĕh mă ƀar păh lăng trŭh, lơ̆m au đei tơdrong Biển Đông păng pơma hơdăh rim tĕh đak kăl tơgop lơ̆m vei kơ jăp rơngei hiôk hian, sơđơ̆ng păng pơdrŏng hơnŭk hơnoa. Lăp đơ̆ng rŏng ‘nŏh, Thủ tướng Phạm Minh Chính hăm Thủ tướng Phalăng Jean Castex hlôi vang năm pơm lê̆h kĭ pơkăp rim tơdrong drơ̆ng minh nơ̆r jang hơdoi ƀar păh hơnih bơ̆ jang păng hơnĭh mơdro sa kơ ƀar tĕh đak.

Tơblơ̆ nơ̆r: Amazưt