VOV4.Bahnar - Pơ gê  ‘năr 13/10, Thủ tướng teh đak Phạm Minh Chính hlôi pơ ma dơ nuh hăm bơ ngai tăh hla pơ lei tơm Cần Thơ kiơ̆ trong trực tuyến, hơ met ăn ‘măng hop akŏm mă 2, Kuôk hô̆i jăl 15. Tang măt Khŭl kơ dră teh đak 1 ‘măng dơ̆ng Thủ tướng lăng ‘lơ̆ng tơ drong jang kiơ̆, mơ̆t jang ‘lơ̆ng đơ̆ng bơ ngai tăh hla pơ lei tơm Cần Thơ lơ̆m tơ drong jang tang găn jĭ COVID-19 păng pơ vei, tơ iung ming, hơ tŏk tơ iung mŭk drăm - tơ pôl.

Thủ tướng teh đak Phạm Minh Chính pơ ma dơ nuh hăm bơ ngai tăh hla pơ lei tơm Cần Thơ

Hăm hơ năp jang ‘noh jĭ Bơ ngai tang măt Kuôk hô̆i kơ pơ lei tơm Cần Thơ, Thủ tướng teh đak vang tơ roi 1,2 tơ drong đei bơ ngai tăh hla bơ ngơ̆t truh nhen: tơ drong jang tang găn jĭ COVID-19; tơ drong hơ tŏk tơ iung mŭk drăm - tơ pôl 9 khei sơ năm 2021 kơ teh đak pơ ma atŭm păng kơ pơ lei tơm Cần Thơ pơ ma hơ drô̆. Thủ tướng teh đak ‘meh vă, kiơ̆ lơ̆m jơ hngơ̆m đon tơ goăt tơ goăl, drơ̆ng 1 nơ̆r, hơ drin kơ dih, Cần Thơ kăl kơ chăng hloh dơ̆ng, hơ drin hloh dơ̆ng, tơ tĕnh jăh tơ iung ming, hơ tŏk tơ iung mŭk drăm - tơ pôl.

Thuem: Tơ blơ̆