VOV4.Bahnar - Năr 08/10/2021 tơ̆ hơnĭh bơ̆ jang Khŭl kơdră Tĕh đak,Thủ tướng Tĕh đak Phạm Minh Chính pơma dơnŭh păng điên thoăi hăm Bơngai tang măt ăn Ƀok kơdră tơm Mi găh tơdrong Tơplĭh tŏ ‘mi kial John Kerry. Ƀar păh drơ̆ng mĭnh nơ̆r lăng hơlen tơdrong tơgoăt tơgoăl dĭh băl Việt Nam – Mi đơ̆ng rŏng 25 sơnăm hơnơ̆ng atŏk tơ iung sơđơ̆ng, lơ̆m au jang hơdoi mŭk drăm-mơdro sa, jang hơdoi atŏk tơ iung kơ jăp ‘lơ̆ng ‘nŏh tơdrong tơm păng jang hơdoi ŭnh hơyŭh rơgŏh ‘nŏh jing tơdrong kăl hlŏh. Ƀlep lơ̆m jơ ‘năr au, tang măt ăn Khŭl kơdră Tĕh đak păng kon pơlei Việt Nam, Thủ tướng Tĕh đak Phạm Minh Chính jei pơma tơbăt jơhngơ̆m đon bơnê kơ Khŭl kơdră păng kon pơlei tĕh đak Mi hlôi tơgŭm vaccine păng tơmam drăm jang pơgang ăn Việt Nam vă tang găn jĭ hơbŭh Covid-19 lơ̆m khei năr au ki. Thủ tướng tĕh đak Phạm Minh Chính hôn bơnê kơtang trong bơ̆ jang kơtang đơ̆ng Ƀok kơdră tơm Joe Biden pơtrŭt kơtang rim tơdrong jang atŭm lơ̆m plei tĕh vă tơ jră hăm tơplĭh tŏ ‘mi kial. ‘Nau jing tơdrong sơđơ̆ng ăn plei tĕh kơna kăl iung jang hơdoi lơ̆m plei tĕh. Thủ tướng tĕh đak sơkơ̆t hơdăh, mă đơ̆ng lơ̆m bơ̆ jang tơplĭh jang mŭk drăm rơgŏh ‘lơ̆ng tơ ƀơ̆p lơ tơdrong tơnap tap, Việt Nam hơnơ̆ng pơkăp kơtang iung jang tang găn tơplĭh tŏ ‘mi kial. Thủ tướng athei păh Mi hơnơ̆ng tơgŭm djru Việt Nam hơmet pơ ‘lơ̆ng đơ̆ng tơblăh vang sơ̆, măkăl pơm rơgŏh ƀrơ̆m phao pơgang dioxin, đơ̆ng nŏh tơgop pơm rơgŏh cham char păng atŏk tơ iung kơ jăp ‘lơ̆ng tơ̆ Việt Nam.

Tơblơ̆ nơ̆r: Amazưt