VOV4.Bahnar - Ƀlep lơ̆m Thủ tướng Phạm Minh Chính đei pôk tơmơ̆t jang Thủ tướng Tĕh đak Cộng hòa xã hội chủ nghĩa Việt Nam, năr 20/4, Thủ tướng Singapore Lý Hiển Long hlôi krao điên thoăi hmach bơnê.

Thủ tướng Tĕh đak Phạm Minh Chính pơma dơnŭh păng điên thoăi hăm Thủ tướng Singapore Lý Hiển Long.

Thủ tướng Phạm Minh Chính bơnê kơ Thủ tướng Singapore hlôi pơtrŭh kơthơ păng krao điên thoăi hmach chơt hơ iă, tơbăt jơhngơ̆m đon ‘mĕh vă jang hơdoi kơ jăp găm Thủ tướng Lý Hiển Long vă pơtrŭt kơtang hlŏh dơ̆ng tơgoăt tơgoăl Jang sa hơdoi gĭt kăl Việt Nam – Singapore lơ̆m rim tơdrong jang. Ƀar Thủ tướng tơbăt jơhngơ̆m đon chơt hơ iă tơ̆ hơnăp hơyak atŏk tơ iung ‘lơ̆ng hơ iă lơ̆m tơgoăt tơgoăl jang hơdoi ƀar păh, ư̆h kơ mơ̆ng bri dôm tơdrong tơnap tap kơ yuơ jĭh hơbuh Covid-19 pơm ăn. Ƀar Thủ tướng drơ̆ng mĭnh nơ̆r atŏk kơtang jang hơdoi lơ̆m rim tơdrong jang đei păng gơ̆h jang nhen jang jên hu, kmăi kmŏk pơre nơ̆r kơtơ̆ng ang, tơmam drăm chŏh jang sa, ka hơdang, pơtho pơhrrăm, trong hnam ... pơ̆ih să trŭh rim tơdrong jang gơ̆h hơgei kmăi kmŏk ‘măng mă 4 nhen atŏk tơ iung ŭnh hơyŭh rơgŏh, tơring kơdrơ̆m hơgei, tơplĭh ‘nao tơchăr, mŭk drăm kơsô̆ păng jang kmăi kmŏk kơsô̆; tơbăt dĭh băl trong jang ‘lơ̆ng hơ iă lơ̆m vei lăng păng atŏk tơ iung mŭk drăm, pơtho pơjing khŭl jang, mă kăl khŭl jang gơ̆h hơgei.

Tơblơ̆ nơ̆r: Amazưt