VOV4.Bahnar - Pơ gê ‘năr 09/11, tơ̆ Anih bơ̆ jang kơ Khŭl kơ dră teh đak, Thủ tướng teh đak Phạm Minh Chính hlôi sơng pơ ma dơ nuh hăm Kơ dră tơm jang tơ bôl teh đak Australia Marise Payne ƀlep ƀơ̆t ‘măng năm tơ mang tơ̆ Việt Nam. Thủ tướng Phạm Minh Chính hmach chhôk hơ iă kơ dôm jơ nei mă Khŭl kơ dră teh đak păng kon pơ lei Australia hlôi iŏk đei lơ̆m tơ drong jang tang găn jĭ hơ buh Covid-19 păng tơ iung ming, hơ tŏk tơ iung mŭk drăm lơ̆m khei ‘năr âu ki; bơ nê kơ Khŭl kơ dră teh đak Australia hlôi pơ kăp tơ gŭm 5,2 triệu kơ liêu vắc-xin ăn Việt Nam păng ‘meh păh Australia hơ nơ̆ng vang hơ dai hăm Việt Nam lơ̆m tang găn jĭ hơbuh păng tơ iung ming, hơ tŏk tơ iung mŭk drăm tơ pôl....Thủ tướng lăng ‘lơ̆ng iŏk yua Hop akŏm Kơ dră tơm jang tơ bôl ‘măng mă 3 đơ̆ng 2 teh đak, akhan ‘nâu jĭ tơ ƀôh hơ dăh ăn tơ drong hơ drin đơ̆ng 2 păh pơ trŭt tơ drong pơ vei jang hơ dai. Thủ tướng Phạm Minh Chính athei păh Australia hơ nơ̆ng pơ vei tơ gŭm hơ tŏk tơ iung tơ pă ăn Việt Nam păng set hơ len pơ̆ih ‘măng anih tĕch mơ dro ăn 1,2 tơ mam đơ̆ng choh jang sa - kơ hơ dang tĕch tơ lĕch tơ̆ teh đak đe kơ Việt Nam kŭm nhen set hơ len tơ lĕch jang Tơ drong jang pơm hla ar ăn bơ ngai jang chŭn mir Việt Nam; pơ trŭt anih jang mơ dro sa 2 teh đak tơ mơ̆t jên jang tĕch mơ dro.

Thuem: Tơ blơ̆