VOV4.Bahnar - Kơsơ̆ năr 10/9, tơ̆ hơnĭh bơ̆ jang Khŭl kơdră Tĕh đak, Thủ tướng Tĕh đak Phạm Minh Chính hlôi sơng pơma dơnŭh hăm Kơdră tang măt tĕh đak Hà Lan Elsbeth Akkerman.

Tơ̆ jơ tơ ƀơ̆p, Kơdră tang măt Tĕh đak Hà Lan sơkơ̆t hơdăh, Khŭl kơdră Tĕh đak Hà Lan lăng kơ jăp tơdrong tơgoăt Jang hơdoi tôm tong, Jang hơdoi gĭt kăl găh oei sa joăt hăm tơdrong tơplĭh tŏ ‘mi kial păng vei lăng đak păng chŏh jang sa kơ jăp ‘lơ̆ng hăm Việt Nam, lăng ‘nŏh jing hơyak kơ jăp, tơgop hơnhăk tơgoăt tơgoăl ƀar păh Khŭl kơdră Tĕh đak păng hơnĭh mơdro sa ƀar tĕh đak hơnơ̆ng atŏk tơ iung kơtang hlŏh dơ̆ng păng iŏk đei jơnei. Thủ tướng Phạm Minh Chính athei Kơdră tang măt chă pơma dơnŭh apĭnh athei Khŭl kơdră tĕh đak, rim hơnĭh bơ̆ jang ƀơm trŭh păng hơnĭh mơdro sa kơ Hà Lan hơnơ̆ng tơgŭm djru Việt Nam hrôih sơng iŏk đei pơgang vaccine ‘moi kiơ̆ lơ trong nhen ăn asong tŏk iŏk dăh mă plang ăn, adoi nhen tơgŭm djru pơgang ming hơmet jĭ Covid-19 păng tơmam drăm jang pơgang ăn Việt Nam. Găh tơdrong Biển Đông, Kơdră tang măt Elsbeth Akkerman tơbăt Hà Lan tơgŭm djru trong jang kơ ASEAN, sơkŏt hơdăh ‘mĕh vă vei kơ jăp rơngei hiôk hian, sơđơ̆ng dơ̆ng kơ jăp păng yak hiôk hian ăn duk păng gre păr chă păr, xek tơlang tơdrong tơgar hăm rim trong rơngei hiôk hian, ‘moi kiơ̆ khôi luơ̆t apŭng plĕnh tĕh, lơ̆m au đei Tơdrong Pơkăp Liên hợp quốc găh Khôi luơ̆t Đak dơsĭ 1982.

Tơblơ̆ nơ̆r: Amazưt