VOV4.Bahnar - Kơ sơ̆ ‘năr 13/7, tơ̆ anih jang kơ Khŭl kơ dră teh đak, Thủ tướng Phạm Minh Chính hlôi bơ̆ jang hăm Anih tơm vei lăng găh jŏh ayŏ tơ plŏng kơ dâu păng tơ mang lăng găh tơ drong jang tơ plŏng kơ dâu păng tơ ƀơ̆p muh măt 1,2 ‘nu bơ ngai tơ plŏng hơ dâu pran, hơ gei vang pơ long Olympic Tokyo 2020. Pơ ma tơ gop nơ̆r tơ̆ jơ bơ̆ jang, Thủ tướng Phạm Minh Chính tơ roi rơ đăh, tơ drong jang pơ tâp pơ hrăm đă ƀŏng tơ plŏng kơ dâu, hơ tŏk ‘lơ̆ng jơ hngơ̆m pran tơ pôl ‘noh jĭ 1 trong jang tih đơ̆ng Đảng, teh đak bơ̆n. Đei jơ hngơ̆m pran mă pơ jing đei teh đak. Vă jê̆ truh kơnh, rim bơ ngai pơ long chơt hơ iă tang măt ăn kơ mâu hla kơ teh đak vang pơ long Olympic Tokyo 2020. ‘Nâu jĭ chơt hơ iă ăn anih jang tơ plŏng kơ dâu, ăn kơ dih bơ ngai pơ long. Mă loi ‘noh jĭ tơ plŏng kơ dâu ăn bơ ngai jo po. Thủ tướng pơ ư kơ dôm jơ nei mă tơ plŏng kơ dâu Việt Nam hlôi iŏk đei lơ̆m khei ‘năr âu ki, mă loi ‘noh jĭ jơ hngơ̆m đon pơ long pơ jei đơ̆ng bơ̆n roi ‘năr roi kơ tang. Ƀlep lơ̆m ‘măng âu thủ tướng kŭm gơ̆ih nơ̆r pơ lung păng gơ̆ih nơ̆r thơ thâu truh đĭ đăng rim bơ ngai tơ plŏng kơ dâu vang pơ long Olympic Tokyo 2020.

Thuem: Tơ blơ̆