VOV4.Bahnar - Kơ sơ̆ ‘năr 19/11, Thủ tướng teh đak Phạm Minh Chính păng rim bơ ngai tang măt Kuôk hô̆i găh Khŭl tang măt Kuôk hô̆i pơ lei tơm Cần Thơ tơ ƀơ̆p pơ ma dơ nuh hăm bơ ngai tăh hla pơ lei tơm Cần Thơ. Tơ̆ jơ tơ ƀơ̆p pơ ma dơ nuh hăm bơ ngai tăh hla, tơl nơ̆r apĭnh đơ̆ng bơ ngai tăh hla, Thủ tướng teh đak Phạm Minh Chính tơ roi tơ băt truh bơ ngai tăh hla Cần Thơ tơ drong đei ƀôh jĭ hơ buh krê hơ mơt lơ̆m apŭng plĕnh teh păng lơ̆m teh đak. Hơ dai hăm ‘noh Thủ tướng hlôi tơl nơ̆r dôm grŭp tơ drong hơ dăh pơm lăp hăm tơ drong ‘meh vă đơ̆ng bơ ngai tăh hla. Mă loi ‘noh jĭ găh athei hơ met pơ ‘lơ̆ng tơ mam ya, tơ mam răt ôn đơ̆ng teh đak đe, Thủ tướng tơ băt Khŭl kơ dră teh đak gô khŏm jang kơ tang tơ drong ‘nâu, Tơ lĕch tơ drong tơ chơ̆t  98, tơ lĕch lơ tơ drong tơ mơ̆t dơ̆ng tơ drong sek phak, athei rim kơ dră, sek phak tơ păt kiơ̆ tơ drong hơ găt đơ̆ng khôi luơ̆t, athei rim khŭl jang kơ pal mơ̆t jang tơ hli, vei lăng kơ jăp, pơm kơ tang hloh, sek phak đei yua hloh.

Thuem: Tơ blơ̆