VOV4.Bahnar - Drơ̆ng nơ̆r krao hơ vơn đơ̆ng Thủ tướng teh đak Campuchia Hunsen, Thủ tướng Teh đak Phạm Minh Chính hlôi chĕp kơ̆l Khŭl tang măt Việt Nam vang hop akŏm Kơ dră kơ pal jang hơ dai Á - Âu (ASEM) ‘măng mă 13 pơ gơ̆r đơ̆ng ‘năr 25 – 26/11/2021 kiơ̆ trong trực tuyến. ‘Nâu jĭ tơ drong jang gĭt kăl hloh kơ jang hơ dai ASEM lơ̆m 3 sơ năm âu ki păng pơ gơ̆r ƀlep năr tơ băt 25 sơ năm pơ jing Hop akŏm (1996 – 2021). Vang Hop akŏm sơ năm ‘nâu  đei Kơ dră chĕp kơ̆l gĭt kăl păng bơ ngai tang măt kơ 53 teh đak vang jang lơ̆m ASEM. Hăm hơ năn “ Hơ met ming tơ drong jang lơ pang yua kơ jang tŏk atŭm”, rim kơ dră chĕp kơ̆l ASEM hlôi pơ ma dơ nuh găh dôm tơ drong hơ drin atŭm păng jang hơ dai lơ pang lơ̆m hơ met pơ ‘lơ̆ng rim trong jang lơ̆m tơ ring păng jơ̆p plei teh, tơ jră jĭ hơ buh COVID-19, pơ trŭt tơ iung ming păng hơ tŏk mŭk drăm kơ jăp, tôm, păng hơ tŏk loi dơ̆ng jang hơ dai tơ pôl păng joh ayŏ. Rim kơ dră chĕp kơ̆l kŭm vang tơ roi băl đon tơ chĕng găh tơ drong chĭnh trĭ, mŭk drăm tơ̆ 2 châu lục păng pơ ma dơ nuh găh  lơ trong vă pơ trŭt hloh dơ̆ng jang hơ dai ASEM.

Thuem: Tơ Blơ̆