VOV4.Bahnar - Pơ gê ‘năr 25/11, hơ nơ̆ng tơ drong jang ‘măng năm tơ mang tơ̆ teh đak Nhật Bản, Thủ tướng Teh đak Phạm Minh Chính hlôi vang Hop akŏm pơ trŭt tơ mơ̆t jên jang Việt Nam-Nhật Bản hăm hơ năn “Việt Nam - Nhật Bản hơ tŏk ‘lơ̆ng tơ drong pơ vei, jang hơ dai vang hơ tŏk tơ iung”. Tơ̆ hop akŏm, Thủ tướng Teh đak Phạm Minh Chính tơ băt, ƀok ‘nao đei ‘măng pơ ma đam tôch jơ nei hăm Thủ tướng Nhật Bản Kishida Fumio păng 2 păh drơ̆ng nơ̆r tơ lĕch tơ drong tơ chơ̆t atŭm 2 teh đak Việt Nam-Nhật Bản, pơ ma hơ dăh, tơ drong pơ vei Việt Nam - Nhật Bản tŏk bŏk tơ̆ khei ‘năr ‘lơ̆ng hơ iă hloh đơ̆ng sơ̆ truh dang ei.

‘Nâu jing hơ nih vă pơ trŭt tơ ƀơ̆p băl, hơ tŏk tơ iung rim tơ drong đơ̆ng 2 teh đak, lơ̆m noh đei jang hơ dai hơ tŏk tơ iung mŭk drăm. Thủ tướng Phạm Minh Chính tơ băt, Việt Nam đei lơ hơ nih ‘lơ̆ng hơ iă vă rim bơ ngai tơ mơ̆t jên jang gơh sơ đơ̆ng jơ hngơ̆m tơ mơ̆t jên jang hăm kơ sô̆ jên tih hloh păng đunh đai, Việt Nam pơ kăp pơm rim tơ drong hiôk găh trong tơ gŭm, hla ar hanh chĭnh vă anih jang mơ dro sa, lơ̆m noh đei anih jang mơ dro sa Nhật Bản tơ mơ̆t jên jang hiôk, đei yua tơ̆ Việt Nam.

Thuem: Tơ blơ̆