VOV4.Bahnar - Gơmăng năr 9/8, Thủ tướng Tĕh đak Phạm Minh Chính vang hop akŏm păng iung pơma gĭt kăl tơ̆ ‘măng Pơma dơnŭh trŭk tuyên Khŭl kơdră kơpal kơ Jơnŭm vei lăng sơđơ̆ng Liên hợp quốc hăm hơnăn “Atŏk kơtang vei lăng sơđơ̆ng Đak dơsĭ: Mĭnh tơdrong jang hơdoi apŭng plĕnh tĕh”. ‘Nau ‘măng mă blŭng Jơnŭm vei lăng sơđơ̆ng Liên hợp quốc pơgơ̆r hop akŏm hơdrô̆ găh tơdrong vei lăng sơđơ̆ng đak dơsĭ lơ̆m khei ‘năr đei lơ tơdrong long roi kơtang găh sơđơ̆ng đak dơsĭ apŭng plĕnh tĕh păng tơ̆ rim tơring. Lơ̆m nơ̆r iung pơma tơ̆ Jơnŭm vei lăng sơđơ̆ng, Thủ tướng Tĕh đak Phạm Minh Chính pơma tơbăt trŭh trong tơlĕch jang, trong jang tĭh kơ Đảng păng tĕh đak bơ̆n găh đak dơsĭ, lơ̆m au đei Trong jang atok tơ iung kơ jăp ‘lơ̆ng mŭk drăm đak dơsĭ Việt Nam; athei atŏk kơtang jang hơdoi apŭng plĕnh tĕh vă xek tơlang rim tơdrong long atŭm găh sơđơ̆ng đak dơsĭ, pơtrŭt kơtang tơdrong yom kiơ̆, pơm kiơ̆ khôi luơ̆t apŭng plĕnh tĕh, mă kăl Tơdrong pơkăp Liên hợp quốc găh Khôi luơ̆t Đak dơsĭ 1982 păng sơđơ̆ng pơm tơm kơ dĭh, tơdrong đei iŏk yua trŏ ƀlep kơ rim tĕh đak tơ ter đak dơsĭ; đơ̆ng nŏh tơ ƀô̆h hơdăh hơnăp jang, tơgop iung jang đơ̆ng Việt Nam hăm tơdrong jang kơ Jơnŭm Vei lăng sơđơ̆ng păng pơchŏh trong ăn pơma dơnŭh găh đak dơsĭ tơ̆ rim ‘măng hop akŏm lơ pang pơma atŭm.

Tơblơ̆ nơ̆r: Amazưt