VOV4.Bahnar - Hop akŏm Khŭl jang hơdoi kơ yuơ atŏk tơ iung ‘lơ̆ng păng trong jang lơ̆m plei tĕh (P4G) 2030 pơgơ̆r lơ̆m năr 30-31/5/2021 pơgơ̆r kiơ̆ trư̆k tuyên kơ yuơ Ƀok kơdră tơm tơngla Hàn Quốc Mun Chê In chĕp pơgơ̆r. Thủ tướng Tĕh đak Phạm Minh Chính vang năm ‘măng Pơma dơnŭh khŭl kơdră kơpal hăm sơnong jang ‘nŏh jĭ kơdră vang jang tơchăr pơjing kơ P4G.  Tơdrong jang gĭt kăl hlŏh kơ Hop akŏm ‘nŏh ‘măng pơma dơnŭh khŭl kơdră kơpal pơgơ̆r gơmăng năr 31/5/2021 (kiơ̆ jơ Việt Nam) hăm đei vang hop akŏm trư̆k tuyên đơ̆ng Kơdră kơpal rim tĕh đak Hàn Quốc, Đan Mạch, Cô-lôm-bi-a, Kơdră chĕp pơgơ̆r Dơnŏ anĭh bơ̆ jang châu Âu, Việt Nam, Hà Lan, Kê-ni-a, Cốt-xơ-ta Ri-ca, Pê-ru, Áo, Thái Lan, Cam-pu-chia, Bơngai tang măt bơ̆ jang tơplĭh tŏ ‘mi kial kơ Ƀok kơdră tơm Mi păng Kơdră chĕp pơgơ̆r Hơnĭh mong jên Apŭng plĕnh tĕh (IMF). Tơ̆ Hop akŏm, rim kơdră akŏm pơma dơnŭh pêng tơdrong kăl lơ̆m chăl hrei au. ‘Nŏh hơmet pơ ‘lơ̆ng tơdrong rơgŏh ‘lơ̆ng đơ̆ng rŏng jĭ hơbuh Covid-19, tơdrong hơdrin đơ̆ng apŭng plĕnh tĕh iŏk đei hơmet pơ ‘lơ̆ng các-bon trŭh sơnăm 2050 păng atŏk kơ tang iung jang kơ yuơ tŏ ‘mi kial păng pơjing rơvơn ăn jang hơdoi tĕh đak-kon pơlei. Iung pơma tơ̆ hop akŏm kơdră kơpal, Thủ tướng Tĕh đak Phạm Minh Chính pơma hơdăh, đơ̆ng tơdrong jĭ hơbŭh păng tơdrong tơnap tap, tơdrong long jei pơm ăn rim tĕh đak ƀô̆h hơdăh hlŏh dơ̆ng tơdrong kăl kơ vei lăng năng tông groi tĕh erĭh sa. Thủ tướng athei, kon pơlei lơ̆m plei tĕh kăl kơrŭn mĭnh jơhngơ̆m đon xek tơlang hơmet pơ ‘lơ̆ng ƀar păh tơdrong ‘mĕh vă hơmet pơ’lơ̆ng mŭk drăm hăm tơdrong pơ koĕl atŏk tơ iung rơgŏh ‘lơ̆ng păng atŏk tơ iung kơ jăp ‘lơ̆ng hlŏh dơ̆ng lơ̆m khei ‘năr đơ̆ng rŏng ji hơbŭh Covid-19.

Tơblơ̆ nơ̆r: Amazưt