VOV4.Bahnar - Pơ ma tơ̆ ‘măng hop akŏm trực tuyến lơ̆m teh đak Anih pơ gơ̆r jang kơ teh đak hăm Anih pơ gơ̆r jang 63 dêh char, pơ lei tơm vă hơ len lăng pơ tôch yak blŭng tơ drong jang tang găn jĭ COVID-19 lơ̆m ‘măng mă 4 păng pơ ma dơ nuh dôm trong jang tang găn jĭ, tơ iung ming mŭk drăm - tơ pôl tơ̆ hơ năp kơnh pơ gơ̆r lơ̆m pơ gê ‘năr 17-10, Thủ tướng teh đak Phạm Minh Chính, Kơ dră Anih pơ gơ̆r jang kơ teh đak tang găn jĭ COVID-19 pơ ma hơ dăh, athei pơm tơ drong ‘lơ̆ng hơ iă lơ̆m chĕp kơ̆l, pơ gơ̆r jang kiơ̆ rim trong jang tơ gŭm, tơ drong tơ chơ̆t, tơ drong hơ găt lơ̆m tang găn jĭ vă drơ̆ng 1 nơ̆r lơ̆m teh đak, kơ dră hơ la athei mơ̆ng kiơ̆ kơ dră kơ pal; kơ dră hơ la ưh kơ gơh tơ lĕch tơ drong hơ găt glăi hăm tơ drong hơ găt đơ̆ng kơ dră kơ pal. ‘Năr 11/10, Khŭl kơ dră teh đak hlôi tơ lĕch tơ drong tơ chơ̆t kơ sô̆ 128 găh tơ drong hơ găt pơ gia “ pơm lăp sơ đơ̆ng, tơ tĕnh, vei lăng đei yua jĭ COVID-19”. Dang ei, lơ dêh char, pơ lei tơm hlôi pơm rơ hơi tơ drong yak vih vơ̆t lơ̆m tơ pôl, tơ plih dar deh jing pơm lăp sơ đơ̆ng, tơ tĕnh, vei lăng đei iŏk yua jĭ COVID-19. Tơ̆ ‘măng hop akŏm âu, Anih pơ gơ̆r jang kơ teh đak păng Anih pơ gơ̆r jang rim tơ ring gô dăr hơ len đơ̆ng rŏng 1 giĕng jang kiơ̆ tơ drong tơ chơ̆t kơ sô̆ 128 đơ̆ng khŭl kơ dră teh đak. Mă loi ‘noh set hơ len găh dôm tơ drong oei tơ hlăk lơ̆m tơ chơ̆t, mă loi ‘noh dôm tơ drong tơ hlăk tơ hlĭn lơ̆m kơ plăh jang kiơ̆ vă đei hơ met tơ tom, athei pơm tơ drong drơ̆ng nơ̆r đơ̆ng trung ương truh tơ ring.

Thuem: Tơ blơ̆