VOV4.Bahnar - ‘Năr (28/9), pơ ma pơ tôch hop akŏm trư̆k tuyê̆n lơ̆m tĕh đak găh tơ drong tơ mât jên jang kơ tĕh đak, Thủ tướng Phạm Minh Chính pơ ma hơ dăh, Khul kơ dră tĕh đak, Thủ tướng tĕh đak đei lơ tơ drong tơ plih ‘nao, pran kơ tang lơ̆m tơ drong pơ gơ̆r tơ mât jên jang kơ tĕh đak sơ năm 2021.

Thủ tướng Phạm Minh Chính pơ ma lơ̆m hop akŏm

Khul kơ dră tĕh đak, Thủ tướng tĕh đak hơ nơ̆ng chih hơ dăh trong jang, tơ drong pơ hnŏng vă jang, chĕp kơ̆l pơ gơ̆r ‘nŏh jĭ "adrin tơ lĕch jên jang sơ năm 2021 đei hlŏh 95% nơ̆r hơ găt, tơ gop gĭt kăl lơ̆m tơ drong jang atŏk tơ iung ming dơ̆ng păng jang tŏk mŭk drăm lơ̆m khei ‘năr đei jĭ Covid-19". Tơ drong tơ lĕch jên tơ mât jang kơ tĕh đak hlôi đei jang hrơ̆ch ‘lơ̆ng păng iŏk đei 1,2 tơ drong jơ nei ‘lơ̆ng.

Thủ tướng pơ ma hơ dăh, tơ mât jên jang kơ tĕh đak jĭ 1 tơ drong tôch gĭt kăl, vă jang đei tơ drong jang atŏk tơ iung mŭk drăm tơ pôl sơ năm 2021, dôm khei oei đei dơ̆ng kơ sơ năm 2021, Thủ tướng athei dôm anih tơm, anih jang kơ pal, tơ ring tơ rang bơ̆ jang mă pran, hrơ̆ch ‘lơ̆ng rim trong jang, hơ met pơ ‘lơ̆ng dôm tơ drong tơ hlăk tăk găn trong vă tưk tơ iung hrĕnh tơ drong tơ lĕch jên jang.

Dơ̆ng: Tơ blơ̆