VOV4.Bahnar - Năr 13/9, Thủ tướng Tĕh đak Phạm Minh Chính, Kơdră Kơdră chĕp pơgơ̆r Tĕh đak tang găn jĭ Covid-19 pơm tơm hop akŏm trư̆k tuyên hăm rim tơring, phương, thĭ trân, apŭng, thĭ xăh, pơlei tơm, rim dêh char Tiền Giang, Kiên Giang găh bơ̆ jang tang găn jĭ Covid-19.

Rup hop akŏm tơ̆ hơnĭh Khŭl kơdră tĕh đak

‘Nau dêh char đei ƀô̆h đei tơring ‘nao tơpŏh jĭ kơtang. Iung pơma tơ̆ hop akŏm, Thủ tướng Phạm Minh Chính  mĭnh ‘măng dơ̆ng sơkơ̆t hơdăh, trong trŏ ƀlep kơ trong bơ̆ jang iŏk tơring, phương pơm dur, kon pơlei ‘nŏh khul bơ̆ jang; kon pơlei mĭnh păh ‘nŏh hơnĭh tơm, mĭnh păh ‘nŏh bơngai tơngla lơ̆m tang găn jĭ. Tơdrong ba tơdrong jang pơgang vĭh tơ̆ tơring tơjê̆ kon pơlei hlŏh hlôi tơgop gĭt kăl lơ̆m pơm dă ƀiơ̆ bơ̆ jang trăp ăn khŭl kơpal, bơngai jĭ đei ming hơmet hloi păng pơm dă ƀiơ̆ chơ ba ming hơmet tơ̆ hnam pơgang kơpal, pơm dă ƀiơ̆ măt bơngai lôch. Hơdrô̆ ƀar dêh char Kiên Giang, Tiền Giang tơdrong jĭ hơbŭh oei tôch kơtang; lơ tơring, phương, thĭ trân “tŏk bŏk ư̆h kơ đei bơngai jĭ, tŏk bŏk dă ƀiơ̆ hli hlơt” hlôi jing tơring đei bơngai tơpŏh jĭ lơ, ‘nŏh jing tơdrong tơtăm hlŏh. Thủ tướng ‘mĕh vă 2 dêh char au tơroi tơbăt hơdăh găh bơ̆ jang chĕp pơgơ̆r, pơrô̆ tang găn jĭ, đơ̆ng nŏh hơlen hơdăh kơ yuơ kă kiơ pơm ăn dơ̆ng, đơ̆ng nŏh hơmet ming rim trong jang vă pơgơ̆r jang kiơ̆, rim trong jang tang găn jĭ jơnei hlŏh.

Tơblơ̆ nơ̆r: Amazưt