VOV4.Bahnar  – 'Năr brei (13/9), Thủ tướng Phạm Minh Chính hlôi bơ̆ jang trư̆k tuyê̆n hăm ƀar dêh char Tiền Giang păng Kiên Giang găh tơdrong jang tang găn păng tơjră pơrang jĭ Covid-19. Xơkơ̆t tơdrong hop akŏm, Thủ tướng Phạm Minh Chính ră hơdăh, tơdrong hop akŏm trư̆k tuyê̆n hăm ƀar dêh char, trư̆k tuyê̆n truh tơ̆ xăh, phương, thĭ trâ̆n noh jing tơdrong tơm đei tơmơ̆ng nơ̆r tơgop đơ̆ng dôm bơngai juăt jang, akŏm lơ tơdrong hlôh vao găh jang y tê̆, hlôh vao tôm tong găh trong tang găn păng tơjră pơrang jĭ.

          Ƀar dêh char Kiên Giang, Tiền Giang adrin hloh dơ̆ng, pơm kiơ̆ pơkăp oei tơklăh lơ̆m tơpôl lơ̆m 2 khei kơ âu, mă lei, lơ̆m dôm giĕng kơ âu, tơdrong đei ƀôh tam mă xơđơ̆ng nhen 'meh vă.  Thủ tướng tơlĕch tơchơ̆t, pơđĭ tơdrong tơm găh tơdrong pơgơ̆r jang, đei hloi tơdrong tơm pơm jang. Kiơ̆ đơ̆ng pơma đam tơ̆ dêh char, xăh, phương noh ƀôh dôm tơdrong âu duh oei rơhơi, tam mă băt hơdăh, pơm jang oei pơxuơ̆k pơxuơ̆l; tơroi tam mă kơjăp trŏ hăm tơdrong đei ƀôh hăm pơrang jĭ hơbuh. Thủ tướng teh đak pơgơ̆r Tiền Giang păng Kiên Giang kăl kơ 'nôh hloh dơ̆ng lơ̆m tang găn păng tơjră pơrang jĭ Covid-19, tenh kuăng tang găn tơdrong tơpoh đơ̆ng pơrang jĭ.

Lan chih păng pơre nơ̆r