VOV4.Bahnar - Tang măt ăn Thủ tướng, Phó Thủ tướng Lê Minh Khái ‘nao kĭ tơ chơ̆t kơ sô̆ jên vă răt dơ̆ng 19.998.810 kơ liêu vaccine tang găn jĭ COVID-19 BNT162 đơ̆ng Pfizer.

Tơ chơ̆t chih hơ dăh, iŏk yoa 2 rơ bâu 652 ti 537 triu hlak jên đơ̆ng Anih mong jên vắc xin tang găn jĭ COVID-19 Việt Nam vă răt dơ̆ng 19.998.810 kơ liêu vaccine tang găn jĭ COVID-19 BNT162 đơ̆ng Pfizer păng tơ lĕch jên vă bơ̆ jang dôm tơ dỏng ƀet vaccine tang găn jĭ COVID-19 kiơ̆ nơ̆r athei đơ̆ng Anih tơm vei lăng jang pơ gang.

Thủ tướng tĕh đak pơ jao ăn Anih tơm vei lăng jên hu tơ lĕch jên kiơ̆ tơ drong hơ găt. Anih tơm vei lăng jang pơ gang, Anih tơm vei lăng jên hu athei chĭu pŭ găh rim tơ drong păng kơ sô̆ chih tơ roi. Tơ drong vei lăng, iŏk yoa, kla jên kơ pal athei pơm kiơ̆ tơ drong hơ găt, trŏ tơ drong vă yoa, 'mơ 'met, đei yoa 'lơ̆ng, rơ đăh rơ đong. Anih tơm vei lăng jang pơ gang tơ roi ăn Thủ tướng tĕh đak găh tơ drong iŏk yoa jên kơ pal kiơ̆ tơ drong hơ găt.

Dơ̆ng: Tơ blơ̆