VOV4.Bahnar – Kơmăng năr 23/11 (kiơ̆ jơ Việt Nam), ƀơ̆t ‘măng năm tơmang teh đak Nhâ̆t, Thủ tướng Phạm Minh Chính hlôi tơjrâ̆m dôm bơngai hŏk kơjung, bơngai jang khoa hŏk Việt Nam tơ̆ teh đak Nhâ̆t. Tơ̆ jơ tơjrâ̆m, dôm bơngai hŏk kơjung, bơngai jang khoa hŏk hlôi tơroi hăm Thủ tướng dôm tơdrong đei jơnei lơ̆m hơlen ‘nao găh minh ƀar tơdrong jang nhen điê̆n tưh, pơjing unh hơyuh rơgõh ơđơ̆ng, jang y tê̆, kơ̆l ‘ngok kơmăi kơmŏk... Tơbang tơdrong hơ iă, pôk bơnê hăm đe jang khoa hŏk, Thủ tướng ră hơdăh, pơkăl chĕp vei kơjă kăp gĭt kơ kon bơngai, kơ̆l ‘ngok Việt Nam, atŭm hăm noh pơkăp minh ƀar đê tai hơlen akŏm mă tơdrong erih oei kăl. Thủ tướng ‘meh vă dôm bơngai hŏk kơjung, bơngai jang khoa hŏk Việt Nam tơ̆ Nhâ̆t pơtoi hơlen akŏm, đei lơ tơdrong jơnei ang hơdăh hloh dơ̆ng, iŏk yua tơnăp tơdrong rơroh hăm dôm bơngai jang khoa hŏk, anih jang khoa hŏk lơ̆m kơpal teh, hơ ‘nhăk tơdrong rơgei po vă plang ăn pơlei pơla, teh đak păng tơgop hơmet tơbôl, jang hadoi đơ̆ng 2 teh đak Việt Nam – Nhâ̆t. Duh lơ̆m kơmăng năr 23/11,Thủ tướng teh đak bơ̆n Phạm Minh Chính hlôi tơjrâ̆m pơma dơnuh hăm kon pơlei Việt Nam tơ̆ teh đak Nhâ̆t; Thủ tướng xơkơ̆t, Đảng, Teh đak hơnơ̆ng pơm trong hiôk hloh vă kon pơlei tơgop jơhngơ̆m hơtŏk tơ iung teh đak.

Lan chih păng pơre nơ̆r