VOV4.Bahnar - Kơsơ̆ brei, năr 15/3, tơ̆ hơnĭh bơ jang kơ Khul kơdră Tĕh đak, Thủ tướng Nguyễn Xuân Phúc pơm tơm hop akŏm Khŭl kơdră chĕp pơgơ̆r Tĕh đak pơma dơnŭh găh Trong pơ prŏ hơdrol Tơchơ̆t đơ̆ng Dơnŏ anĭh Chĕp pơgơ̆r Kuô̆k hô̆i sơkơ̆t hơdăh kon jên rok trong gre rĕnh kơ yuơ Tĕh đak tơmơ̆t jên jang. Akhan, tơdrong iŏk jên rok trong gre rĕnh hăm rim hơnĭh jang kơ yuơ Tĕh đak tơmơ̆t jên jang ‘nŏh tơdrong kăl hlŏh vă pơdreo ăn kon jên tok iŏk, hơmet ming trong nơnăm đơ̆ng rŏng au kơnh ... Mă lei Thủ tướng sơkơ̆t hơdăh ư̆h khan vă mơdro sa iŏk đei yua ăn tĕh đak kơna tơdrong iŏk jên au vă đei kon jên pơdreo ăn đơ̆ng tŏk iŏk, vă ăn chă ming hơmet dơ̆ng trong nơnăm au đơ̆ng rŏng au kơnh… ‘Moi kiơ̆ nơ̆r tơgop đơ̆ng rim hơnĭh tơm, hơnih jang, kiơ̆ đơ̆ng Thủ tướng, khei ‘năr dang ei tơlĕch ăn minh tơdrong hơdăh, đei ƀơm trŭh kon pơlei păng tơdrong jang mŭk drăm lei kăl lăng hơlen mă hơdăh. Trong vă pơjing Khôi luơ̆t trong nơnăm hơmet ming tŏk bŏk lơ̆m khei ‘năr pơjing keh đang, kơna kăl tơmơ̆t tơdrong au lơ̆m tơdrong vă pơjing Khôi luơ̆t.

Tơblơ̆ nơ̆r: Amazưt