VOV4.Bahnar - Pơ gê ‘năr 26/10, Thủ tướng teh đak Phạm Minh Chính chĕp kơ̆l khŭl tang măt gĭt kăl kơ Việt Nam vang hop akŏm kiơ̆ trong trực tuyến Hop akŏm tih Khŭl rim teh đak Đông Nam Á ‘măng mă 38 (ASEAN 38) kiơ̆ nơ̆r krao hơ vơn đơ̆ng ƀok pơ tao teh đak Brunei Hasanal Bolkiah, Kơ dră ASEAN sơ năm 2021. Hop akŏm âu ‘noh jĭ ‘măng vă Việt Nam hơ nơ̆ng sơ kơ̆t hơ dăh trong jang tơ bôl hiôk hian, pơm tơ ‘ngla kơ dih, đei lơ trong jang, mơ̆t jang hơ dai hăm apŭng plĕnh teh tôm drong păng jrŭ să.

Pơ ma tơ̆ Hop akŏm, Thủ tướng teh đak Phạm Minh Chính akhan, kŭm hăm vei kơ jăp jơ nei hlôi iŏk đei, tŭn pran tơ drong jang hơ dai tơ ring, pơ jing tơ pôl, kăl băt hơ dăh anih dơ̆ng ‘nao kơ ASEAN lơ̆m rim tơ drong jang pơ vei mŭk drăm - chĭnh trĭ tŏk bŏk hơ met ming dơ̆ng kơ apŭng plĕnh teh. Tơ pôl ASEAN kăl kơ hơ met ming hơ năp jang ‘noh jĭ tơ drong tơm kơ rim tơ drong pơ ma dơ nuh, jang hơ dai mŭk drăm lơ pang tơ̆ tơ ring. Vă vang jang jrŭ hloh lơ̆m rim tơ drong tĕch mơ dro kơ tơ ring păng jơ̆p plei teh, hơ tŏk tơ drong hơ iă đơ̆ng anih tĕch mơ dro ASEAN păng tŭn pran tơ drong tơ iung ming mŭk drăm đơ̆ng rŏng jĭ hơ buh.

Đơ̆ng rŏng vang hop akŏm tih ASEAN 38, Thủ tướng Phạm Minh Chính chĕp kơ̆l khul tang măt ăn Việt Nam vang hop akŏm tih ASEAN 39. Pơ ma lơ̆m hop akŏm, Thủ tướng Phạm Minh Chính tơ ƀôh đon ‘mĕh vă đei 1 tơ ring rơ ngei hiôk hian, sơ đơ̆ng ‘lơ̆ng păng jang hơ doi vă akŏm jơ hngâm tang găn jĭ, jang tŏk dơ̆ng, hơ nơ̆ng vei kơ jăp tơ drong hơ nŭk hơ noa lơ̆m grŭp.

Mă lei tơ pă tơ̆ yăn âu, lăng ƀôh lơ tơ drong krê, ƀơm ưh ‘lơ̆ng truh tơ drong sơ đơ̆ng tơ̆ tơ ring. Thủ tướng Phạm Minh Chính kŭm athei ASEAN athei đei đon tơ chĕng lei lăi băl tơ̆ hơ năp dôm tơ drong lơ̆m tơ ring păng apŭng plenh tĕh; hôn bơ nê dôm tĕh đak vang jang hơ doi, hăm đon jang tơ năp, ‘lơ̆ng, năng kăl luơ̆t apŭng plenh tĕh, ưh đei pơm kơ nê̆ truh tơ drong rơ ngei, sơ đơ̆ng, jang hơ doi păng jang tŏk tơ̆ tơ ring, năng kăl hơ năp jang đơ̆ng ASEAN păng pơ ma nuh tôm tơ drong hăm ASEAN kiơ̆ đơ̆ng lơ trong jang, hop akŏm yoa ASEAN pơ jing păng pơ gơ̆r, ASEAN iŏk jang tơ drong jang tơm hlŏh.

Thuem hăm Dơ̆ng: Tơ blơ̆